शिरूर (अरुणकुमार मोटे): अमली पदार्थांच्या विरोधात कारवाई करत असल्याचे वरवर चित्र रंगवणाऱ्या यंत्रणांच्या आतच गुन्हेगारीची मुळे खोलवर रुजल्याचे धक्कादायक वास्तव शिरूर पोलिस व गुन्हे अन्वेषण शाखा पुणे ग्रामीणने उघड केले आहे. आतापर्यंत अंदाजे तब्बल १० किलो वजनाचे, सुमारे २० कोटी रुपये किमतीचे ड्रग्स जप्त करण्यात आले असून, या प्रकरणात नगर स्थानिक गुन्हे शाखेतील (LCB) पोलिस हवालदारच थेट ड्रग्स रॅकेटमध्ये सामील असल्याचे निष्पन्न झाले आहे. ही बाब केवळ कायदा-सुव्यवस्थेवर प्रश्नचिन्ह उभे करणारी नसून, संपूर्ण पोलिस यंत्रणेच्या विश्वासार्हतेला हादरा देणारी ठरली आहे.
ड्रग्स तस्करी प्रकरणातील मुख्य आरोपींपैकी शाम सुंदर गुजर (रा. नेप्ती, ता. नगर, जि. अहिल्यानगर) हा नगर एलसीबीमध्ये पोलिस हवालदार म्हणून कार्यरत असल्याचे समोर येताच खळबळ उडाली. समाजात कायद्याचे रक्षण करणारा म्हणून ओळख असलेला हा अधिकारी प्रत्यक्षात ड्रग्स माफियांचा ‘आतील माणूस’ असल्याचे तपासात उघड झाले आहे. विशेष म्हणजे, गुन्हेगारांवर छापे टाकणाऱ्या यंत्रणेत बसूनच तो अमली पदार्थांच्या तस्करीला संरक्षण, माहिती व सोयी पुरवत होता, असा संशय तपास यंत्रणांनी व्यक्त केला आहे. अखेर पुरावे ठोस झाल्यानंतर त्याला अटक करून गजाआड करण्यात आले आहे.
या प्रकरणात ड्रग्सचा माल पुरवणारा माऊली शिंदे (रा. कोहकडी, ता. पारनेर) यालाही पोलिसांनी अटक केली असून, आतापर्यंत आरोपींची संख्या तीन झाली आहे. गुजर या साखळीतील महत्त्वाचा वितरक असल्याचे सांगितले जात आहे. शिंदे याच्या माध्यमातून ड्रग्स ग्रामीण भागात तसेच तरुणाईपर्यंत पोहोचवले जात असल्याचा संशय आहे.
तपासादरम्यान समोर आलेल्या माहितीनुसार, हे ड्रग्स केवळ जिल्ह्यापुरते मर्यादित नसून आंतरजिल्हा व आंतरराज्य नेटवर्कशी जोडलेले असण्याची दाट शक्यता आहे. पोलिस हवालदाराचा सहभाग असल्याने या रॅकेटला दीर्घकाळ अभय मिळाले का, याबाबत गंभीर प्रश्न उपस्थित होत आहेत. या कारवाईनंतर जनतेत संतापाची लाट उसळली असून, “जर कायद्याचे रक्षकच भक्षक बनले असतील, तर सामान्य नागरिकांनी न्यायाची अपेक्षा कुणाकडून करावी?” असा थेट सवाल उपस्थित केला जात आहे. अमली पदार्थांचे वाढते जाळे तरुण पिढी उद्ध्वस्त करत असताना, त्याला आळा घालण्याची जबाबदारी असलेलेच अधिकारी जर त्यात सहभागी असतील, तर ही बाब अत्यंत धोकादायक असल्याचे नागरिकांचे म्हणणे आहे.
दरम्यान, वरिष्ठ पोलिस अधिकाऱ्यांनी या प्रकरणाची गंभीर दखल घेत इतर कर्मचाऱ्यांचीही चौकशी सुरू केली असून, आणखी नावे समोर येण्याची शक्यता नाकारता येत नाही. या प्रकरणामुळे नगर पोलिस खात्यातील अंतर्गत शिस्त, नियंत्रण व पारदर्शकतेवर मोठे प्रश्नचिन्ह निर्माण झाले आहे. ड्रग्सविरोधी लढा केवळ घोषणांपुरता न राहता, स्वतःच्या खात्यातील काळी मेंढरे शोधून काढून त्यांच्यावर कठोर कारवाई होणे गरजेचे आहे, अन्यथा ‘ड्रग्समुक्त समाज’ हा केवळ कागदी नारा ठरेल, अशी संतप्त प्रतिक्रिया नागरिकांतून व्यक्त होत आहे.
शिरूरमध्ये एमडी ड्रग्जविरोधात धडक कारवाई; कोट्यावधींच्या मुद्देमालासाह आरोपीला अटक…
मोठी बातमी! शिरुर तालुक्यात फिनेलच्या नावाखाली ड्रग्जची निर्मिती; १७४ किलो ड्रग्ज जप्त
शिरूरमध्ये मध्यरात्री बिबट्याचा थरार! नागरिक सतर्क, वन विभाग अलर्ट मोडवर
मोठा कट उघड! शिरूर भूमी अभिलेख कार्यालयातील ३ कर्मचाऱ्यांसह दहा जणांवर गंभीर गुन्हे दाखल…
शिरूर! पंचनाम्याच्या बदल्यात ‘दर ठरवला’; लाच घेताना ग्राम महसूल अधिकारी एसीबीच्या जाळ्यात…
१० नोव्हेंबरच्या निवडणुकीत सर्व संचालकांना मतदानाची संधी द्या; सतेज पाटील यांच्या पाठीशी काँग्रेस ठाम मुंबई: गोकुळ…
लग्न म्हणजे केवळ दोन जीवांचे मिलन किंवा दोन कुटुंबांचे नाते नाही, तर दोन व्यक्तींनी एकमेकांच्या…
नोंदणी शुल्क मुख्यमंत्री सहाय्यता निधीला देणार; ३५ मराठी चित्रपट, ७ परिसंवाद, ४ विशेष मुलाखती आणि…
चंद्रकांतदादा पाटील यांचे तातडीने कार्यवाहीचे निर्देश; कुलगुरूंना जागा उपलब्ध करून देण्याच्या सूचना मुंबई : राज्यातील विद्यार्थ्यांना…
राहुल गांधींचे हात बळकट करण्यासाठी काँग्रेसमध्ये प्रवेश; हर्षवर्धन सपकाळ यांच्या उपस्थितीत टिळक भवनात पक्षप्रवेश सोहळा…
महायुती सरकारवर काँग्रेस प्रदेशाध्यक्षांचा जोरदार हल्लाबोल; ‘गोकुळ’वर कब्जा करण्याचा सरकारचा डाव असल्याचा आरोप मुंबई: राज्यातील…