शिक्रापुर (अक्षय टेमगिरे) शिरुर तालुक्यातील पारोडी गावातील हिंदू-मुस्लिम ऐक्याचे प्रतीक असलेली सुप्रसिद्ध पिरसाहेबांची पारंपरिक यात्रा उद्या मंगळवार (दि २८) ऑक्टोबर रोजी दरवर्षीप्रमाणे उत्साहात साजरी होणार असुन या यात्रेला राज्यभरातुन दरवर्षीप्रमाणे हजारो भाविक उपस्थित राहणार आहेत.
पारोडी येथील पिरसाहेब यात्रेची सुरुवात सोमवारी मध्यरात्री १२ च्या दरम्यान पारंपरिक ढोल-ताशांच्या गजरात मिरवणुक निघाल्यानंतर संदल होणार आहे. त्यानंतर फुलांची चादर आणि मलिदाचा नैवेद्य अर्पण करुन भाविक व ग्रामस्थ यात्रेच्या मुख्य सोहळ्याची सुरुवात करतील. हि यात्रा सलग दोन दिवस चालणार असुन सर्व जातीधर्माचे नागरिक या उत्सवात सहभागी होतात.
पारोडी गावातील ग्रामपंचायत आणि यात्रा कमिटीचे अध्यक्ष राहुल ढमढेरे, उपाध्यक्ष भानुदास टेमगिरे आणि समस्त ग्रामस्थ पारोडी यांच्या पुढाकाराने यात्रेच्या आयोजनाची जय्यत तयारी करण्यात आली आहे. यात्रेनिमित्त येणाऱ्या भाविकांच्या आणि पाहुण्यांच्या मनोरंजनासाठी विशेष कार्यक्रमांचे आयोजन करण्यात आले आहे.
पारोडी गावातील पिरसाहेब यात्रा हि केवळ धार्मिक सोहळा नसुन भक्ती, ऐक्य आणि परंपरेचे प्रतीक बनली आहे. भाविकांनी श्रद्धेने व शिस्तबद्ध पद्धतीने यात्रेचा आनंद घ्यावा, असे आवाहन आयोजक व यात्रा कमिटीच्या वतीने करण्यात आले आहे.
मंगळवार (दि २८) रोजी रात्री १० वाजता साहेबराव नांदवळकर तमाशा मंडळाच्या वतीने वगनाट्य सादर केले जाणार आहे. बुधवार (दि २९) रोजी सकाळी हजेरी आणि रात्रीसुद्धा साहेबराव नांदवळकर तमाशा मंडळाचा मनोरंजनाचा कार्यक्रम होणार आहे. बुधवार (दि २९) रोजी दुपारी ४ वाजता कुस्त्यांचा जंगी आखाडा आयोजित केला असुन यामध्ये शिरुर तालुक्यातील नामांकित पैलवान सहभागी होणार आहेत. शिक्रापुर पोलीस स्टेशनच्या वतीने यात्रेदरम्यान कोणताही अनुचित प्रकार घडू नये यासाठी कडक बंदोबस्त ठेवण्यात येणार आहे.
Video; शिरुरमध्ये सुडाच्या राजकारणामुळे कार्यकर्त्यांचा संयम संपला; शेखर पाचुंदकर
