मुंबई: छोट्या पडद्यावर नव्या मालिकांची रेलचेल सुरू असताना कलर्स मराठीने आणखी एका मालिकेची घोषणा करत प्रेक्षकांची उत्सुकता वाढवली आहे. ‘मी जिंकून घेईन सारं’नंतर आता ‘मोहिनी’ या नव्या मालिकेचा पहिला प्रोमो प्रदर्शित करण्यात आला आहे.
काही दिवसांपूर्वी फक्त टीझरमधून ‘मोहिनी’ची झलक दाखवण्यात आली होती. मात्र, आता अधिकृत प्रोमो समोर आल्यानंतर मालिकेबाबतची चर्चा रंगू लागली आहे. विशेष म्हणजे, मालिकेच्या नावाप्रमाणे ‘मोहिनी’ची भूमिका कोण साकारणार याची उत्सुकता शिगेला पोहोचली होती. अखेर अभिनेत्री अनघा ठाकूर हिची या मुख्य भूमिकेसाठी निवड झाल्याचे स्पष्ट झाले आहे. या मालिकेद्वारे अनघा पहिल्यांदाच मुख्य नायिकेच्या भूमिकेत झळकणार आहे.
अनघाच्या जोडीला लोकप्रिय अभिनेता समीर परांजपे मुख्य भूमिकेत दिसणार आहे. सुंदरा मनामध्ये भरली या मालिकेमुळे तो घराघरांत पोहोचला होता. त्यानंतर स्टार प्रवाहवरील थोडं तुझं आणि थोडं माझं या मालिकेतही त्याने प्रमुख भूमिका साकारली होती. आता तो पुन्हा एकदा कलर्स मराठीवर कमबॅक करत आहे.या मालिकेत समीर ‘RK’ ही भूमिका साकारणार असून, मोहिनीचा स्वाभिमान आणि RK चा अहंकार यांच्यातील संघर्ष ही कथेची मध्यवर्ती बाजू असणार आहे. या नात्यातून उलगडणारा भावनिक आणि नाट्यमय प्रवास प्रेक्षकांना पाहायला मिळणार आहे.
दरम्यान, सोशल मीडियावर ‘मोहिनी’ ही मालिका कलर्स हिंदीवरील गाजलेल्या मधुबाला – एक इश्क एक जुनून या मालिकेचा रिमेक असल्याच्या चर्चा रंगल्या आहेत. मात्र, याबाबत अद्याप अधिकृत पुष्टी झालेली नाही.‘मोहिनी’ची प्रसारण तारीख आणि वेळ अद्याप जाहीर करण्यात आलेली नसून, ही मालिका नेमकी कधी छोट्या पडद्यावर झळकणार याकडे प्रेक्षकांचे लक्ष लागले आहे.
