मुंबई (प्रतिनिधी): महाराष्ट्र शासनाच्या राज्य युवा धोरण समितीवर विशेष निमंत्रित सदस्य म्हणून ॲड संग्रामसिंह नाथाभाऊ शेवाळे यांची नियुक्ती करण्यात आली आहे. लंडन येथे कायद्याचे उच्च शिक्षण पूर्ण केल्यानंतर भारतात परतताच त्यांनी शैक्षणिक, सामाजिक आणि राजकीय क्षेत्रात अनेक राज्यव्यापी उपक्रम राबवले. विद्यार्थी, युवक तसेच विविध समाजघटकांच्या प्रश्नांवर ते सातत्याने काम करीत आहेत.
राज्य सरकारने दिलेल्या या संधीबद्दल त्यांनी माजी पंतप्रधान एच डी देवेगौडा, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजितदादा पवार, क्रीडा व युवक कल्याणमंत्री माणिकराव कोकाटे तसेच संबंधित विभागातील अधिकारी यांचे मनःपुर्वक आभार मानले.
“या समितीच्या माध्यमातून युवकांसाठी शिक्षण, रोजगार, क्रीडा, सामाजिक नेतृत्व आणि आत्मनिर्भरतेचे नवे व प्रभावी मार्ग शोधण्याचा माझा नेहमीच प्रयत्न असेल. महाराष्ट्रातील युवकांच्या स्वप्नांना बळ देणारे, त्यांना संधी उपलब्ध करुन देणारे आणि त्यांचे भविष्य उज्ज्वल करणारे धोरण निर्माण करण्यासाठी मी कटिबद्ध राहीन,” असे निवडीनंतर ॲड संग्रामसिंह शेवाळे यांनी सांगितले.
