मुंबई: ‘बिग बॉस मराठी’च्या घरात नुकताच दुसरा भाऊचा धक्का पार पडला असून, यावेळी सूत्रसंचालक रितेश देशमुख यांनी थेट अनुश्रीची शाळा घेतली आहे. दुसऱ्या आठवड्यात घडलेल्या वादामुळे प्रेक्षकांमध्ये याची उत्सुकता होती आणि अखेर तो क्षण समोर आला आहे.
या आठवड्यातील राशन टास्कदरम्यान अनुश्री आणि प्राजक्ता यांच्यात वाद झाला होता. या वादात अनुश्रीकडून शिवीगाळ झाल्याचा आरोप प्राजक्ताने केला होता. ही बाब प्राजक्ताने आपल्या ग्रुपमधील सदस्यांना सांगितल्यानंतर दीपाली सय्यद यांनी अनुश्रीला जाब विचारला. त्यावेळी अनुश्रीने केलेले,
“आईला घेऊन आली होतीस… आता पप्पांना घेऊन ये!”
हे वक्तव्य घरातील सदस्यांसह प्रेक्षकांनाही खटकलं होतं.
या घटनेवरूनच भाऊच्या धक्क्यावर रितेश देशमुख यांनी अनुश्रीचा समाचार घेतला. प्रोमोमध्ये रितेश म्हणताना दिसतात,
“अनुश्री, जेव्हा प्राजक्ता दीपालीला घेऊन आल्या, तेव्हा तुम्ही काय म्हणालात? आईला घेऊन आलीस… जा आता बाबांना घेऊन ये!”यावर अनुश्री हसताना दिसल्याने रितेश अधिकच संतापले.”ए… लक्ष इथे! तिने भावाला आणलंय. हे ‘बिग बॉस’चं घर आहे. इथे मस्तीत नाही, शिस्तीत राहायचं!”असा थेट इशारा त्यांनी दिला.
रितेशचा रोख पाहून अनुश्री पूर्णपणे गोंधळल्याचं दिसून आलं. या प्रोमोवर सोशल मीडियावर प्रतिक्रिया देत नेटकऱ्यांनी कमेंट्सचा पाऊस पाडला आहे.“किती आतुरतेने वाट पाहत होतो”, “भाऊ आला… मस्त झापलं”, “एक नंबर भाऊ”, “योग्यच उत्तर दिलं”, “असंच पाहिजे” अशा अनेक प्रतिक्रिया उमटल्या आहेत.दरम्यान, हा बहुचर्चित भाऊचा धक्का प्रेक्षकांना आज रात्री ८ वाजता कलर्स मराठी आणि जिओहॉटस्टारवर पाहायला मिळणार आहे.
