शिरुर (तेजस फडके) पुणे ते माजलगाव दरम्यान प्रवास करणाऱ्या एसटी महामंडळाच्या बसमधील कंडक्टर आणि ड्रायव्हर यांना शिरुर एसटी डेपो येथे तीन जणांनी लाकडी दांडक्याने मारहाण केल्याची घटना घडली असुन याप्रकरणी शिरुर पोलीस स्टेशनमध्ये तीन अज्ञात व्यक्ती विरोधात गुन्हा दाखल करण्यात आला आहे.
कंडक्टरच्या तक्रारीनुसार, प्रवाशांनी भरलेल्या एसटीमध्ये एक प्रवासी मोठ्या प्रमाणात छत्र्यांचा साठा घेऊन चढण्याचा प्रयत्न करत होता. त्यावेळी कंडक्टरने त्याला विनम्रपणे सांगितले की बसमध्ये जागा नाही, कृपया दुसऱ्या बसने प्रवास करावा. मात्र, यावर संतापून संबंधित प्रवाशाने “एसटी तुझ्या बापाची आहे का?” असे अपमानास्पद शब्द वापरून कंडक्टरला लाकडी दांड्याने मारहाण केली. त्यानंतर त्या प्रवाशाने आणखी दोन व्यक्तींना फोन करून बोलावले आणि त्यांनी मिळून चालकालाही मारहाण केली.
या हाणामारीत कंडक्टरच्या खिशातील अंदाजे २१ हजार रुपये गहाळ झाल्याचेही नमूद करण्यात आले आहे. याबाबत शिरुर पोलीस ठाण्यात अज्ञात तीन व्यक्तींविरोधात गुन्हा दाखल करण्यात आला असून पुढील तपास सुरु आहे.
