नवी मुंबई: रामनवमी निमित्त नवी मुंबईकरांसाठी यंदा खास सांस्कृतिक मेजवानीची पर्वणी ठरणार आहे. सेक्टर १९, भूमिकोलोसा चौक, ऐरोली येथे श्रीराम संकल्प प्रतिष्ठानतर्फे २६ मार्च रोजी भव्य कार्यक्रमाचे आयोजन करण्यात आले आहे.या सोहळ्याचे प्रमुख आकर्षण म्हणजे मुंबई विश्व लोककला मंच सादर करीत असलेला ‘लोककला दर्शन’ हा महाराष्ट्राच्या समृद्ध लोकपरंपरेचा सांगीतिक कलाविष्कार. या कार्यक्रमातून प्रेक्षकांना राज्यातील विविध लोककला, संस्कृती आणि परंपरांचे दर्शन घडणार आहे.
विशेष म्हणजे, या कलाविष्कारातून प्रभू श्रीराम यांच्या पराक्रमाची कथा सादर केली जाणार असून, त्यामुळे धार्मिक आणि सांस्कृतिक अशा दुहेरी आनंदाचा अनुभव प्रेक्षकांना मिळणार आहे. रामनवमीच्या पार्श्वभूमीवर आयोजित हा कार्यक्रम नवी मुंबईकरांसाठी विशेष आकर्षण ठरणार आहे.
सध्या महाराष्ट्रात लोककलांना नवसंजीवनी मिळत असून विविध ठिकाणी भव्य स्वरूपात सादरीकरण होत आहे. अशा पार्श्वभूमीवर भजन किंवा नाटकांपेक्षा वेगळा आणि समृद्ध लोकसंस्कृतीचा अनुभव देणारा हा उपक्रम ऐरोलीतील नागरिकांसाठी अनोखा ठरणार आहे. त्यामुळे सर्व रामभक्त आणि रसिक प्रेक्षकांनी या भव्य ‘लोककला दर्शन’ कार्यक्रमाला आवर्जून उपस्थित राहून महाराष्ट्राच्या संस्कृतीचा आणि प्रभू श्रीराम यांच्या चरित्राचा आनंद घ्यावा, असे आवाहन आयोजकांनी केले आहे.
