शिक्षक मतदारसंघात महायुतीची ताकद दाखवणार; जाहीर सभेकडे राज्याचे लक्ष
मुंबई: विधान परिषद निवडणुकीच्या प्रचाराला वेग आला असून, शिवसेनेचे मुख्य नेते तथा उपमुख्यमंत्री एकनाथ शिंदे रविवार, १८ ऑक्टोबर रोजी अमरावतीत जाहीर सभा घेणार आहेत. अमरावती शिक्षक मतदारसंघातील महायुतीचे अधिकृत उमेदवार आणि विद्यमान आमदार किरण सरनाईक यांच्या प्रचारार्थ ही सभा होणार आहे. या सभेत शिंदे काय भूमिका मांडणार, याकडे राजकीय वर्तुळाचे लक्ष लागले आहे.
अमरावती शिक्षक मतदारसंघातून महायुतीने शिवसेनेचे विद्यमान आमदार किरण सरनाईक यांना पुन्हा उमेदवारी दिली आहे. त्यांच्या प्रचारासाठी उपमुख्यमंत्री शिंदे अमरावती दौऱ्यावर येत असून, सभेच्या यशस्वितेसाठी सरनाईक यांच्या समर्थकांकडून जोरदार तयारी करण्यात आली आहे.
विधान परिषदेच्या पाचही जागांवर महायुतीचे उमेदवार विजयी होतील, असा विश्वास उपमुख्यमंत्री शिंदे यांनी यापूर्वी व्यक्त केला आहे. या पार्श्वभूमीवर अमरावतीतील सभेतून महायुतीच्या प्रचाराला बळ मिळण्याची अपेक्षा पक्षाच्या नेत्यांनी व्यक्त केली आहे. शिंदे यांच्या सभेमुळे सरनाईक यांच्या प्रचाराला अधिक गती मिळणार का, हे पाहणे महत्त्वाचे ठरणार आहे.
दरम्यान, आमदार म्हणून किरण सरनाईक यांनी विधान परिषदेत केलेल्या कामाचा आढावा शिंदे आपल्या भाषणातून घेण्याची शक्यता आहे. तसेच शिक्षकांचे प्रलंबित प्रश्न, त्यांच्या मागण्या आणि शिक्षण क्षेत्राशी संबंधित मुद्द्यांवरही ते भाष्य करण्याची अपेक्षा आहे. या सभेला जिल्ह्यातील शिक्षक मोठ्या संख्येने उपस्थित राहण्याची शक्यता असून, अमरावती शिक्षक मतदारसंघातील निवडणुकीच्या प्रचारात या सभेला विशेष महत्त्व प्राप्त झाले आहे.
