मुंबई: उपमुख्यमंत्री एकनाथ शिंदे यांच्या टीका केल्या प्रकरणी स्टॅण्ड अप कॉमेडियन कुणाल कामराच्या शोला उपस्थित लावणाऱ्या प्रेक्षकांनाही अडचणींचा सामना करावा लागत आहे. मुंबई पोलीसांनी कामराच्या शोला उपस्थित राहणाऱ्या प्रेक्षकांना नोटीस पाठवल्या आहेत. शिवाय त्यांचा जबाबही नोंदवला जाणार आहे. यावरून राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी संताप व्यक्त केला आहे.
रोहिणी खडसे म्हणाल्या आहेत की, कामराच्या शोला ज्यांनी प्रेक्षक म्हणून हजेरी लावली त्यांना नोटीसा कसल्या पाठवता ? आधी आपली मुंबई ही महिलांसाठी खरंच सुरक्षित आहे का ? ते पहा… असे म्हणत त्यांनी मुंबई पोलीसांना धारेवर धरले आहे. पुढे बोलताना त्यांनी ताजी आकडेवारी जाहीर करत म्हटले आहे की, फार लांबचे नाही मागील फेब्रुवारी महिन्याच्या २८ दिवसात ७९ बलात्काराचे गुन्हे दाखल झाले आहेत, १०१ महिलांचे अपहरण करण्याचे प्रकार घडले आहेत.
आता आपण महिला सुरक्षेसाठी यंत्रणा लावणार आहात की कामराच्या शोचे तिकीट कुणी घेतले त्यासाठी ? असा सवालही त्यांनी शेवटी उपस्थित केला आहे.
