मुंबई: रोमानिया – मिलिसाऊटी शहराचे महापौर वांगले कॅमेरे यांनी आज मुंबईच्या महापौर रितू राजेश तावडे यांची महापौर दालनात सदिच्छा भेट घेतली.
या भेटीदरम्यान दोन्ही शहरांमधील नागरी सुविधा, विशेषतः घनकचरा व्यवस्थापन, कचऱ्यापासून वीज निर्मिती प्रकल्प तसेच पर्यावरणपूरक उपक्रमांवर सविस्तर चर्चा करण्यात आली. मिलिसाऊटी शहरातील आधुनिक घनकचरा व्यवस्थापन प्रणाली आणि कचऱ्याचे ऊर्जेमध्ये रूपांतर करण्याच्या प्रकल्पांची माहिती महापौर तावडे यांनी जाणून घेतली. भविष्यात या क्षेत्रात परस्पर सहकार्य आणि अनुभवांची देवाणघेवाण करण्याबाबतही सकारात्मक चर्चा झाली.प्रारंभी महापौर रितू तावडे यांनी वांगले कॅमेरे यांचे पुष्पगुच्छ व भेटवस्तू देऊन स्वागत व सत्कार केला.
याप्रसंगी सहआयुक्त (सुधार) संजोग कबरे, उपायुक्त (घनकचरा व्यवस्थापन) किरण दिघावकर, प्रमुख अभियंता (रस्ते व वाहतूक) स्वामी तसेच व्यवसाय विकास विभागाच्या प्रमुख शशी बाला उपस्थित होत्या.या सदिच्छा भेटीमुळे दोन्ही शहरांदरम्यान नागरी प्रशासन आणि पर्यावरणीय उपक्रमांमध्ये सहकार्याची नवी दिशा मिळण्याची अपेक्षा व्यक्त करण्यात आली.
