निलंगा : भावाची प्रकृती खालावल्याचे समजताच त्याची विचारपूस करण्यासाठी गेलेल्या धाकट्या भावाची ती भेटच दोघांची अखेरची ठरेल, असे कुणालाही वाटले नव्हते. केळगाव (ता. निलंगा) येथील भाऊराव निवृत्ती राठोडकर (वय ८५) आणि त्यांचे सख्खे भाऊ माणिक निवृत्ती राठोडकर (वय ८२) यांचे शुक्रवारी (दि. २८ ऑगस्ट) एकाच दिवशी निधन झाले. या घटनेने राठोडकर कुटुंबावर दुःखाचा डोंगर कोसळला असून, संपूर्ण केळगाव परिसरात शोककळा पसरली आहे.
भाऊराव राठोडकर हे वृद्धापकाळामुळे आजारी होते. मोठ्या भावाची प्रकृती खालावल्याची माहिती मिळाल्यानंतर माणिक राठोडकर त्यांची विचारपूस करण्यासाठी घरी गेले. मात्र, मोठ्या भावाचे निधन झाल्याचे पाहून त्यांना मोठा धक्का बसला आणि त्यानंतर काही वेळातच माणिक राठोडकर यांनीही प्राण सोडले. भावाची प्रकृती जाणून घेण्यासाठी गेलेली ही भेटच त्यांच्या आयुष्यातील अखेरची भेट ठरली.
View this post on Instagram
आयुष्यभराची साथ; नियतीने एकाच दिवशी हिरावले
भाऊराव आणि माणिक राठोडकर यांचे एकमेकांशी अत्यंत जिव्हाळ्याचे नाते होते. सुख-दुःखात आयुष्यभर एकमेकांना साथ देणाऱ्या या दोन्ही भावांनी एकाच दिवशी जगाचा निरोप घेतल्याने हा योगायोग परिसरातील नागरिकांच्या मनाला चटका लावून गेला.
आयुष्याच्या संध्याकाळीही दोन्ही भाऊ एकमेकांची काळजी घेत होते. मात्र, मोठ्या भावाची प्रकृती पाहण्यासाठी गेलेल्या माणिक राठोडकर यांची ती भेट आता केवळ आठवण बनली आहे. ज्या भावाला भेटण्यासाठी ते गेले, त्याच भावासोबतची ती शेवटची भेट ठरल्याने कुटुंबीयांवर दुःखाचा मोठा आघात झाला आहे.
दोन्ही भावांच्या निधनाची वार्ता समजताच नातेवाईक, मित्रपरिवार आणि ग्रामस्थ सुन्न झाले. कुटुंबातील दोन आधारवड एकाच दिवशी हरपल्याने राठोडकर कुटुंबीयांवर शोककळा पसरली. या हृदयद्रावक प्रसंगाने उपस्थितांच्या डोळ्यांतही अश्रू तरळले.
पश्चात मोठा परिवार
भाऊराव राठोडकर यांच्या पश्चात तीन मुले, एक मुलगी, सुना व नातवंडे असा परिवार आहे. तर माणिक राठोडकर यांच्या पश्चात एक मुलगा व एक मुलगी असा परिवार आहे.
केळगावात अंत्यसंस्कार
दोन्ही भावांच्या पार्थिवदेहावर केळगाव येथील सार्वजनिक स्मशानभूमीत अंत्यसंस्कार करण्यात आले. यावेळी नातेवाईक, मित्रपरिवार आणि ग्रामस्थ मोठ्या संख्येने उपस्थित होते. एकाच दिवशी दोन सख्ख्या भावांना गमावल्याने संपूर्ण केळगाव परिसरात हळहळ व्यक्त होत आहे.
