मुंबई: दादासाहेब फाळके चित्रनगरीने यंदाच्या काळाघोडा कला महोत्सवात “तिच्या जीवनाच्या चौकटी” हे संकल्पनात्मक शिल्प साकारले आहे. महाराष्ट्र चित्रपट, रंगभूमी आणि सांस्कृतिक विकास महामंडळाच्या माध्यमातून साकारलेले हे शिल्प, सिनेमाच्या पडद्यामागे मेहनत करणाऱ्या महिलांच्या योगदानाला समर्पित आहे.
महामंडळाच्या व्यवस्थापकीय संचालक स्वाती म्हसे पाटील यांनी कलाकृतीला भेट देऊन तिच्या सौंदर्यावर आणि संदेशावर आनंद व्यक्त केला. श्रीमती म्हसे पाटील म्हणाल्या की, “प्रत्येक स्त्रीची स्वतःची कथा, संघर्ष आणि स्वप्नं असतात. जशा अनेक चौकटी मिळून एक चित्रपट घडतो, तसंच विविध अनुभवांनी जीवनाला अर्थ मिळतो.” त्यांनी यावेळी शासनाच्या स्त्रीशक्तीला सन्मान देणाऱ्या विविध योजनांचा उल्लेख केला.
कलाकृती डॉ. सुमित पाटील यांनी साकारले असून, यावेळी महामंडळाच्या मुख्यलेखा वित्तधिकारी चित्रलेखा खातू-रावराणे देखील उपस्थित होत्या.काळाघोडा कला महोत्सवाच्या निमित्ताने विविध सांस्कृतिक योजना आणि उपक्रमांचा आढावा घेण्यासाठी अधिक माहिती महामंडळाच्या संकेतस्थळावर पाहता येईल.
