छत्रपती संभाजीनगर :छत्रपती संभाजीनगर जिल्ह्यातील सातारा परिसरात भाऊबंदकीचा वाद आणि राजकीय वैमनस्यातून कथित अघोरी पूजा व काळी जादू केल्याचा धक्कादायक प्रकार समोर आला आहे. माजी सरपंच फेरोज पटेल आणि त्यांच्या तीन भावांना लक्ष्य करून कथित जादूटोण्याचा कट रचल्याचा आरोप असून, या प्रकरणात पोलिसांनी मुख्य आरोपी आयुबखान पठाण याला अटक केली आहे.
तक्रारीनुसार, आरोपीने एका मांत्रिकाच्या मदतीने माजी सरपंच आणि त्यांच्या भावांचे फोटो झाडावर टांगून अघोरी विधी केल्याचा आरोप आहे. तसेच त्यांना जीवे मारणे, आर्थिक व शारीरिक नुकसान करणे आणि खोट्या गुन्ह्यांमध्ये अडकवण्याचा कट रचल्याचाही दावा करण्यात आला आहे.
या प्रकरणाचा उलगडा आरोपीचा माजी चालक व अंगरक्षक मोहम्मद इर्शाद याने केला. जादूटोण्यासाठी मांत्रिकाला आणणे-नेणे आणि पूजेचे साहित्य पुरविण्याची कामे आपण करत असल्याचे लक्षात आल्यानंतर त्याने नोकरी सोडून पोलिसांकडे धाव घेतली. त्याच्या जबाबाच्या आधारे पोलिसांनी तपास सुरू करून मुख्य आरोपीला अटक केली.
या कथित अघोरी विधीमध्ये आणखी कोणाचा सहभाग होता, संबंधित मांत्रिक कोण आहे आणि या कटामागील नेमके कारण काय, याचा सखोल तपास पोलीस करत आहेत. या घटनेमुळे परिसरात मोठी खळबळ उडाली आहे.
