आसाम: आसाममधील कछार जिल्ह्यातील सिल्चर शहरात २८ वर्षीय तरुणीवर तब्बल सात जणांनी सामूहिक लैंगिक अत्याचार केल्याची धक्कादायक घटना उघडकीस आली आहे. या प्रकरणात आरोपींनी पीडिता आणि तिच्या प्रियकराकडून बळजबरीने पैसेही उकळल्याचा आरोप आहे.
१९ फेब्रुवारीची घटना
मिळालेल्या माहितीनुसार, १९ फेब्रुवारी रोजी ही घटना घडली. पीडिता तिच्या प्रियकरासोबत कारमधून फिरायला गेली असताना, सिलचर शहरापासून काही किलोमीटर अंतरावर बायपास रोडवर त्यांना एका एसयूव्हीमधून आलेल्या काही पुरुषांनी अडवलं. आरोपींनी प्रथम त्यांचा पत्ता विचारत संवाद साधला आणि त्यानंतर अचानक दोघांवर हल्ला केला.
पीडितेच्या कुटुंबीयांच्या म्हणण्यानुसार, सुमारे सात जणांनी तिच्या प्रियकरासमोर आळीपाळीने तिच्यावर बलात्कार केला. घटनेनंतर आरोपींनी तिला एका आरोपीच्या खात्यात १० हजार रुपये ट्रान्सफर करण्यास भाग पाडल्याचा आरोपही करण्यात आला आहे.
पोलिसांत गुन्हा दाखल
या प्रकरणी सिल्चर सादर पोलीस स्टेशन येथे विविध कलमांअंतर्गत गुन्हा दाखल करण्यात आला आहे. पोलिसांनी दिलेल्या माहितीनुसार, पीडितेने दोन आरोपींची ओळख पटवली असून त्यांना अटक करण्यात आली आहे. उर्वरित आरोपींचा शोध सुरू आहे.
पीडितेची वैद्यकीय तपासणी करण्यात आली असून तिचा जबाब नोंदवण्यात आला आहे. वरिष्ठ अधिकाऱ्यांनी सांगितले की, प्रकरणाचा तपास सुरू असून संबंधित सर्व आरोपींना लवकरात लवकर अटक करण्यात येईल.
