मुंबई: मराठी आणि हिंदी चित्रपटसृष्टीत आपला ठसा उमटवणारा अभिनेता रितेश देशमुख सध्या दोन कारणांमुळे चर्चेत आहे. एकीकडे तो ‘राजा शिवाजी’ या ऐतिहासिक चित्रपटात छत्रपती शिवाजी महाराजांची भूमिका साकारणार असून त्याचा लूक समोर आला आहे; तर दुसरीकडे त्याने पत्नीच्या नावाबाबतचा गैरसमज दूर केला आहे.
रितेशची पत्नी जिनिलिया देशमुख हिला अनेकदा ‘जेनेलिया’ असे संबोधले जाते. मात्र एका मुलाखतीत रितेशने स्पष्ट शब्दांत सांगितले, “माझ्या बायकोचे नाव जिनिलिया आहे, जेनेलिया नाही.” यापूर्वीही त्याने सोशल मीडियावरून तिच्या नावाचा योग्य उच्चार सांगत चाहत्यांना दुरुस्ती केली होती.
२०१२ साली विवाहबंधनात अडकलेली रितेश-जिनिलिया ही जोडी चाहत्यांची लाडकी जोडी मानली जाते. जिनिलिया हिला ‘महाराष्ट्राची वहिनी’ म्हणूनही ओळखले जाते. नुकतेच तिने लग्नातील काही खास फोटो सोशल मीडियावर शेअर केले होते, ज्यामुळे त्यांच्या लग्नाच्या आठवणी पुन्हा ताज्या झाल्या.
दरम्यान, रितेश आणि जिनिलिया शेवटचे वेड या चित्रपटात एकत्र दिसले होते. या चित्रपटाने बॉक्स ऑफिसवर विक्रमी कमाई करत अनेक मराठी चित्रपटांचे रेकॉर्ड मोडले होते. आता चाहते पुन्हा एकदा या जोडीला मोठ्या पडद्यावर एकत्र पाहण्यासाठी उत्सुक आहेत.
