श्रीगोंदा (विशेष प्रतिनिधी) घोड धरणातील अवैध वाळू उपसा आणि वाहतुकीत हिस्सा मागण्याच्या कारणावरुन रविवार दि २२ डिसेंबर २०२४ रोजी सायंकाळी पाचच्या सुमारास श्रीगोंदा तालुक्यातील पिंपरी कोलंदर परिसरात झालेल्या वादात तीन ते चार जणांनी एका वाळुमाफियावर धारदार शस्त्राने हल्ला करत गंभीर जखमी केल्याची घटना घडली असुन या जखमी वाळुमाफियावर शिरुर येथील खाजगी रुग्णालयात उपचार सुरु असुन याप्रकरणी अद्याप कोणावरही गुन्हा दाखल झाला नसल्याचे बेलवंडी पोलिस स्टेशनचे पोलिस निरीक्षक संतोष भंडारे यांनी सांगितले.
याबाबत सुत्रांच्या मिळालेल्या माहितीनुसार, श्रीगोंदा तालुक्यातील बेलवंडी पोलीस ठाण्याच्या हद्दीत माठ, म्हसे परीसरातील घोडधरणात पात्रात सुरु असलेल्या अवैध वाळू उपसा आणि वाहतुकीत हिस्सा पाहिजे म्हणून म्हसे परिसरातील तीन ते चार जणांचे वाळु माफियासोबत पिंपरी कोलंदर परिसरात दुपारी पाच वाजण्याच्या सुमारास वाद सुरु झाले होते. या वादाचे पर्यवसान भांडणात होऊन तीन ते चार जणांनी वाळू तस्करावर धारदार शस्त्राने हल्ला केला.
या हल्ल्यात केलेला वार वाळु माफियाच्या कंबरेवर बसला. त्यानंतर वाळु तस्कराने तेथून पळ काढल्याने कोणताही अनुचित प्रकार घडला नाही. त्यानंतर जखमी झालेल्या वाळु माफियावर शिरुर येथील खाजगी रुग्णालयात उपचार सुरु आहेत. या प्रकरणी बेलवंडी पोलिस स्टेशन येथे अद्याप कोणावरही गुन्हा दाखल झालेला नाही. या प्रकाराने परीसरात खळबळ उडाली असुन वाळु उपशावरुन वाळु माफियामध्ये अनेकवेळा वाद होत असल्याने कायदा व सुव्यवस्था धोक्यात आली आहे.
पिंपरी कोलंदर येथे घडलेल्या घटनेची माहिती मिळाली असुन मुख्यमंत्र्यांचा दौरा असल्याने मी नगर येथे बंदोबस्तावर होतो. या प्रकरणी अद्याप पोलीस ठाण्यात कुठलीही नोंद झालेली नाही.
संतोष भंडारे
पोलिस निरीक्षक
(बेलवंडी पोलिस स्टेशन)
