रांजणगाव गणपती (तेजस फडके): रांजणगाव औद्योगिक वसाहत परिसरातील महागणपती पार्किंगमधून चोरीस गेलेल्या मोटारसायकलचा छडा लावत रांजणगाव एमआयडीसी (Ranjangaon MIDC) पोलिसांनी आरोपीला धाराशिव जिल्ह्यातून अटक केली. त्याच्याकडुन ३० हजार रुपये किमतीची चोरीची मोटारसायकल जप्त करण्यात आली आहे.
रांजणगाव औद्योगिक वसाहतीमध्ये विविध राज्यांतील आणि जिल्ह्यांतील मोठ्या संख्येने कामगार वास्तव्यास आहेत. त्यामुळे परिसरात दाट लोकवस्ती असून दुचाकी वाहनांचीही मोठी वर्दळ असते. मागील काही दिवसांपासून परिसरात मोटारसायकल चोरीच्या घटना घडत असल्याने पोलिस निरीक्षक कुमार कदम यांनी या प्रकाराची गंभीर दखल घेतली होती. मोटारसायकल चोरीच्या घटनांना आळा घालण्यासाठी त्यांनी तपास पथकातील अधिकारी व अंमलदारांना आवश्यक सूचना देत तपासाला गती दिली होती.
रांजणगाव गणपती येथील राजेंद्र गोटीराम जाधव यांची हिरो होंडा कंपनीची डिलक्स मोटारसायकल क्रमांक एम एच २३ बीजे ५८३६ ही १६ जुलै २०२६ रोजी महागणपती पार्किंगमधून चोरीस गेली होती. याप्रकरणी अज्ञात आरोपीविरुद्ध रांजणगाव एमआयडीसी पोलिस ठाण्यात गुन्हा दाखल करण्यात आला होता.
या गुन्ह्याचा तपास करताना पोलिस कॉन्स्टेबल उमेश कुतवळ आणि पोलिस कॉन्स्टेबल योगेश गुंड यांनी परिसरातील सुमारे २५ ते ३० सीसीटीव्ही कॅमेऱ्यांचे फुटेज तपासले. सीसीटीव्ही फुटेजसह इतर तांत्रिक माहितीच्या आधारे संशयित आरोपीची ओळख पटविण्यात पोलिसांना यश आले.
यावेळी तपासामध्ये शंकर भगवान गोसावी (वय ३८, रा. माकणी, ता. लोहारा, जि. धाराशिव) याचा गुन्ह्यात सहभाग असल्याचे निष्पन्न झाले. त्यानंतर रांजणगाव एमआयडीसी पोलिसांच्या तपास पथकाने धाराशिव जिल्ह्यात जाऊन आरोपीला ताब्यात घेतले. त्याच्याकडून चोरीस गेलेली सुमारे ३० हजार रुपये किमतीची हिरो होंडा डिलक्स मोटारसायकल जप्त करण्यात आली.
आरोपीला २२ जुलै २०२६ रोजी अटक करण्यात आली असून, न्यायालयाकडून त्याची पोलिस कोठडी घेण्यात आली आहे. आरोपीकडे कसून चौकशी सुरु असुन, त्याच्याकडून आणखी मोटारसायकल चोरीच्या गुन्ह्यांची उकल होण्याची शक्यता पोलिसांनी व्यक्त केली आहे.
सदरची कारवाई पुणे ग्रामीणचे पोलिस अधिक्षक संदीप गिल्ल, अपर पोलिस अधीक्षक शुभम कुमार आणि शिरुर विभागाचे उपविभागीय पोलिस अधिकारी रवींद्र भोसले यांच्या मार्गदर्शनाखाली करण्यात आली. रांजणगाव MIDC पोलिस ठाण्याचे पोलिस निरीक्षक कुमार कदम, पोलिस कॉन्स्टेबल उमेश कुतवळ, पोलिस कॉन्स्टेबल योगेश गुंड आणि पोलिस हवालदार अजित पवार यांनी हि कामगिरी केली. या गुन्ह्याचा पुढील तपास रांजणगाव एमआयडीसी पोलिस ठाण्याचे पोलिस हवालदार अजित पवार करीत आहेत.
CCTV तपास ठरला महत्त्वाचा…
मोटारसायकल चोरीनंतर तपास पथकाने परिसरातील २५ ते ३० सीसीटीव्ही फुटेजची बारकाईने पाहणी केली. फुटेज आणि तांत्रिक माहितीची सांगड घालत पोलिसांनी आरोपीचा माग काढला. त्यानंतर थेट धाराशिव जिल्ह्यात जाऊन आरोपीला ताब्यात घेत चोरीची मोटारसायकल हस्तगत केली.
