मुंबई : गणेशोत्सवाच्या पार्श्वभूमीवर पर्यावरणपूरक गणेशोत्सवाला प्रोत्साहन देण्यासाठी महाराष्ट्र राज्य खादी व ग्रामोद्योग मंडळ आणि हातकागद संस्था, पुणे यांच्या संयुक्त विद्यमाने मंत्रालयातील त्रिमूर्ती प्रांगणात ‘Paint Your Own Paper Mache Bappa’ या विशेष कार्यशाळेचे आयोजन करण्यात आले.
उच्च व तंत्रशिक्षण मंत्री चंद्रकांतदादा पाटील यांनी या कार्यशाळेला भेट देत हातकागदाच्या लगद्यापासून तयार करण्यात आलेल्या गणेशमूर्तीला नैसर्गिक रंगांनी रंगविले. यावेळी त्यांनी नागरिकांना पर्यावरणपूरक गणेशमूर्तींचा वापर करून पर्यावरणस्नेही पद्धतीने गणेशोत्सव साजरा करण्याचे आवाहन केले.
कार्यशाळेत नागरिक आणि विद्यार्थ्यांनी पेपर माशेपासून तयार केलेल्या गणेशमूर्तींना नैसर्गिक रंगांच्या माध्यमातून आकर्षक रूप दिले. पर्यावरण संवर्धनासोबतच पारंपरिक हातकागद कलेचे जतन, स्थानिक कलाकारांना प्रोत्साहन आणि ग्रामीण कारागिरांसाठी रोजगाराच्या संधी निर्माण करण्याच्या उद्देशाने हा उपक्रम राबविण्यात आला.पर्यावरणपूरक गणेशोत्सवाची संकल्पना प्रत्यक्ष कृतीतून नागरिकांपर्यंत पोहोचविणारा हा उपक्रम ठरला.
