बारामती: राज्याचे दिवंगत उपमुख्यमंत्री अजितदादा पवार यांच्या सार्वजनिक आणि राजकीय कार्याचा गौरव करत महाराष्ट्र विधानपरिषद व विधानसभा यांनी तयार केलेली स्मृतीपत्रे, तसेच तामिळनाडू विधानसभेने मंजूर केलेल्या शोकप्रस्तावाची प्रत गुरुवारी बारामती येथे उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार यांच्याकडे प्रशासनाच्या वतीने सुपूर्द करण्यात आली.
या प्रसंगी उपविभागीय अधिकारी उत्तम दिघे आणि अपर पोलीस अधीक्षक गणेश बिरादार यांनी विधानमंडळाच्या स्मृतीपत्रांचे वाचन केले, तर तहसीलदार स्वप्नील रावडे यांनी तामिळनाडू विधानसभेच्या शोकप्रस्तावाचे वाचन करून त्याची प्रत सुनेत्रा अजित पवार यांच्याकडे सुपूर्द केली.
कार्यक्रमास बारामती एमआयडीसीचे प्रादेशिक अधिकारी हनुमंत पाटील, उपविभागीय पोलीस अधिकारी चैतन्य कदम, दौंडचे उपविभागीय पोलीस अधिकारी बापूराव तडस, गटविकास अधिकारी किशोर माने यांच्यासह विविध विभागांचे अधिकारी उपस्थित होते.दिवंगत अजितदादा पवार यांच्या कार्याचा गौरव आणि त्यांच्या योगदानाची अधिकृत नोंद म्हणून हा कार्यक्रम पार पडला.
