शिक्रापूर: राज्यातील शिक्षकांचे अनेक प्रश्न सध्या प्रलंबित असून सदर प्रश्नांवर शिक्षक आमदारांसह शिक्षक संघटनेचे व शिक्षण आयुक्त व अधिकाऱ्यांची बैठक नुकतीच संपन्न झाली असून यामध्ये अनेक प्रश्नांवर सकारात्मक चर्चा होऊन उपाययोजना करण्याचे ठरले आहे.
पुणे विभागाचे शिक्षक आमदार प्रा. जयंत असगावकर यांच्या मार्गदर्शनाखाली शैक्षणिक प्रश्नांसंदर्भात सभेचे आयोजन करण्यात आले होते. यावेळी शिक्षण उपायुक्त हरुण आत्तार, शिक्षण उपसंचालक डॉ. वंदना वाहुळ, अधीक्षक कृष्णा डहाळे, महाराष्ट्र राज्य शिक्षकेतर महामंडळाचे सहकार्यवाह शिवाजीराव खांडेकर, महाराष्ट्र राज्य माध्यमिक शिक्षक संघाचे समन्वयक दादासाहेब गवारे यांसह आदी उपस्थित होते. यावेळी महाराष्ट्र राज्य शिक्षकेतर महामंडळाचे सहकार्यवाह शिवाजीराव खांडेकर, महाराष्ट्र राज्य माध्यमिक शिक्षक संघाचे समन्वयक दादासाहेब गवारे यांनी अनेक प्रश्न उपस्थित करत प्रश्न निकाली काढण्याची विनंती केली तर शिक्षक आमदार प्रा. जयंत असगावकर यांनी प्रशासकीय कामकाजाबद्दल नाराजी व्यक्त केली.
दरम्यान शिक्षकांचे पेंडीग पगारबीले, फरक बिले, पी. एफ. स्लीपा व पी. एफ. प्रकरणे, मेडिकल बीले, सेवानिवृत्तांची विविध पेंडींग बीले, शालार्थ प्रणालीमध्ये शिक्षक व सेवकांची नावे समाविष्ट करणे, अनुकंपाखालील पदे भरणे व मान्यता देणे, शिक्षक व सेवकांची पदोन्नती, शिक्षक सेवकांची रिक्त पदे भरणे, वैयक्तिक मान्यता देणे. यांसह आदी विषयांवर सविस्तर चर्चा होत तातडीने उपाययोजना करण्याचे ठरले. तसेच पुणे जिल्हा भविष्य निर्वाह निधी व वेतन पथकाच्या गलथान कारभारामुळे अनेक समस्या निर्माण होत असल्याने कडक उपाययोजना करण्याची सुचना वरिष्ठांना करण्यात आली असून प्रशासनाने दखल घेऊन ठोस पाउले उचलण्याचे मान्य केले आहे.
