शिरूर (अरुणकुमार मोटे): शिरूर येथील थापेमळा भागात (दि. २२) एप्रिल रोजी दुपारी २. २० वाजता एक दुर्दैवी घटना घडली. गंगा एज्युकेशन सोसायटीच्या इमारतीवर प्लास्टरचे काम करत असताना दुसऱ्या मजल्यावरून पडून एका मजुराचा मृत्यू झाला.
मृत मजुराचे नाव अखिलेश कुमार (वय ४५) असून ते मुळचे बिहार राज्यातील सिवान जिल्ह्यातील मुन्दिपुर गावचे रहिवासी होते. सध्या ते शिरूर तालुक्यातील बाबुराव नगर येथे वास्तव्यास होते. हे काम टुनटुन पंडित (वय 33) व्यवसाय लेबर कॉन्ट्रॅक्टर, रा. थापे मळा) यांच्या देखरेखीखाली चालू होते.
सदर ठिकाणी काम चालू असताना तोल गेल्याने अखिलेश कुमार दुसऱ्या मजल्यावरून खाली पडले आणि गंभीर जखमी झाले. त्यानंतर तातडीने त्यांना श्री गणेशा हॉस्पिटल, शिरूर येथे उपचारासाठी दाखल करण्यात आले. मात्र उपचारादरम्यान डॉक्टरांनी त्यांना मृत घोषित केले.घटनेची नोंद शिरूर पोलीस ठाण्यात करण्यात आली असून, या घटनेचा पुढील तपास पो.ह.वा. खेडकर यांच्या मार्गदर्शनाखाली सुरू आहे. या अपघातामुळे कामगार वर्गात हळहळ व्यक्त होत असून, अधिक तपास सुरू आहे.
