संकल्पनेतील शिरूर उपक्रमाची महत्त्वाकांक्षी सुरुवात
शिरूर (अरुणकुमार मोटे): शिरुर हवेलीचेआमदार ज्ञानेश्वर माऊली आबा कटके यांच्या प्रयत्नांतून शिरूर एस.टी. डेपोमध्ये नव्याने पाच एस.टी. बसेस दाखल झाल्या. या बससेवेचा लोकार्पण सोहळा तसेच विविध विकास कामांचा आढावा दौरा त्यांच्या उपस्थितीत मोठ्या उत्साहात पार पडला.
एस.टी. महामंडळाच्या माध्यमातून शिरूर शहर व तालुक्यातील प्रवाशांना आता आधुनिक व वेळेवर चालणाऱ्या बससेवेचा लाभ मिळणार आहे.या नवीन बसेसमुळे खास करून शिरूरच्या ग्रामीण व डोंगराळ भागातील विद्यार्थ्यांना, शेतकऱ्यांना, महिला वर्गाला आणि नोकरदार नागरिकांना प्रवासात मोठा दिलासा मिळणार आहे.
आ. माऊली कटके यांनी गेल्या अनेक महिन्यांपासून या सुविधेसाठी सातत्याने पाठपुरावा केला होता. त्यांच्या विनंतीवरून उपमुख्यमंत्री अजितदादा पवार यांनी त्वरित निर्णय घेतला. लोकार्पण सोहळ्यात आमदार कटके म्हणाले: “शासनाच्या सहकार्याने शिरूरसारख्या वाढत्या लोकसंख्येच्या शहराला ही सेवा मिळणे गरजेचे होते. ही सेवा म्हणजे केवळ वाहतूक नाही, तर ग्रामीण जनतेसाठी नवा दुवा आहे.”
नियोजित दौऱ्यातून सर्वांगीण विकासाचा आढावा आ. माऊली कटके यांनी शिरूर शहरात व तालुक्यात विविध ठिकाणी भेटी देऊन विकासकामांची प्रगती, नागरिकांच्या अडचणी आणि प्रशासनाच्या भूमिकेचा आढावा घेतला.
नगरपरिषद आढावा बैठक नगरपरिषद कार्यालयात झालेल्या बैठकीत शहरातील स्वच्छता, कचरा व्यवस्थापन, नळपाणी योजना, रस्त्यांचे डागडुजी कामे, सांडपाणी निचरा इ. बाबींवर सविस्तर चर्चा झाली. अधिकारी व पदाधिकाऱ्यांना कामांमध्ये गुणवत्ता आणि वेळेचे पालन करण्याच्या सूचना दिल्या.
त्याचबरोबर शिरूर शहरासाठी एक “संकल्पनेतील शिरूर” – आ. माऊली कटके यांच्या पुढाकारातून मॉडेल शहर घडवण्याचा संकल्प केला आहे. शिरूर शहराच्या ऐतिहासिक वैभवाला आधुनिकतेची जोड देत, आमदार माऊली (ज्ञानेश्वर) कटके यांनी संकल्पनेतील शिरूर”या महत्त्वाकांक्षी उपक्रमाची सुरुवात केली आहे. या उपक्रमातून शिरूर शहराचा सर्वांगीण विकास साधत, सर्व घटकांसाठी एक सुरक्षित, सुसज्ज, सुसंस्कृत आणि आधुनिक सुविधा असलेले मॉडेल शिरूरउभे करण्याचा संकल्प हाती घेण्यात आला आहे.
शहराच्या सांस्कृतिक व ऐतिहासिक वारशाचे जतन करत, आधुनिक नागरी सुविधांनी समृद्ध अशा शिरूरच्या नव्या रूपाची उभारणी करण्यासाठी आमदार कटके तसेच शिरूर नगरपालिकेचे मुख्य कार्यकारी अधिकारी यांच्या मार्फत सर्वेक्षण करण्यात आले आहे. प्रत्येक नागरिकाचा सहभाग ही या उपक्रमाची खरी ताकद असेल.नागरिकांच्या सहभागातून, तसेच सर्वेक्षणाच्या माध्यमातून एक मॉडेल शिरूर उभारण्याचे काम आता प्रत्यक्षात सुरू झाले आहे.
सुपर स्पेशालिटी हॉस्पिटल्स आणि आरोग्य केंद्रे, स्थानिक व ग्रामीण भागातील नागरिकांसाठी अत्याधुनिक वैद्यकीय सेवा टेली-मेडिसिन, आपत्कालीन कक्ष, मातृत्व सेवा यावर भर, स्मार्ट शिक्षण सुविधा आणि शाळा,डिजिटल क्लासरूम्स, अभ्यासिका, कौशल्य विकास केंद्रे, गरीब व गरजू विद्यार्थ्यांसाठी विशेष शिष्यवृत्ती योजना,हायटेक बस स्थानक आणि सार्वजनिक वाहतूक व्यवस्था,क्लिन बस स्टॉप्स, डिजिटल वेळापत्रक, पर्यावरणपूरक बसेस,महिलांसाठी स्वतंत्र बस सुविधा,रस्ते व वीज व्यवस्था,रुंदीकरण, सुसज्ज व पथदिवे असलेले रस्ते अंडरग्राउंड वायरिंग व एलईडी स्मार्ट लाइटिंग सिस्टम,सुसज्ज पार्किंग व ट्राफिक नियंत्रण, मल्टिलेव्हल पार्किंग प्रकल्प, स्मार्ट सिग्नल्स व सीसीटीव्ही यंत्रणा,शिरूरचा इतिहास जपणारे संग्रहालय (म्युझियम),शिरूरच्या ऐतिहासिक, सांस्कृतिक व स्वातंत्र्य लढ्यातील योगदानाचे डॉक्युमेंटेशन,विद्यार्थ्यांसाठी शैक्षणिक मार्गदर्शन केंद्र ,स्मार्ट उद्याने आणि हरित क्षेत्र,मुलांसाठी खेळणी, जेष्ठांसाठी चालण्याचे मार्ग, ओपन जिम,स्मार्ट वॉटरिंग सिस्टीम व पर्यावरणपूरक देखरेख, या उपक्रमात नागरिकांचे अभिप्राय, सूचनांचा आदर ठेवून, जनतेच्या सहभागातून अंतिम आराखडा तयार केला जात आहे. प्रत्येक शिरूरकराच्या स्वप्नातील शिरूर प्रत्यक्षात आणण्यासाठी “सर्वेक्षण – संवाद – संकल्पना – अंमलबजावणी” या चार टप्प्यांतून हा प्रकल्प राबवला जाणार आहे. या सर्व संकल्पनांचे रूपांतर प्रत्यक्ष प्रकल्पांत करण्यासाठी आमदार कटके यांनी शासन दरबारी सातत्याने पाठपुरावा केला आणि शासनाकडे जमा असलेली शिरूर शहरातील १७ एकर जागा पुन्हा शिरूर नगरपरिषदेच्या ताब्यात मिळवण्यास ते यशस्वी ठरले. हे यश म्हणजे शिरूरच्या आगामी विकासाला गती देणारा महत्त्वाचा टप्पा आहे.
तसेच या संकल्पनात्मक शिरूरसाठी जवळपास ३०० कोटी निधी लागणार आहे पैकी आ. कटके यांनी शासनाकडून तब्बल ३६ कोटी रुपयांचा निधी देखील मंजूर करून घेतला आहे, जो प्रत्यक्ष कामांमध्ये वापरला जाणार आहे.जसे आपण परदेशात जातो, तसे परदेशी नागरिकही शिरूरमध्ये यावेत.“शिरूर केवळ एक शहर नाही, तर आपली ओळख आहे. जसे आपण युरोप-अमेरिकेतील शहरे पाहतो, तशीच व्यवस्था, सौंदर्य आणि सुविधा आपल्या शिरूरमध्ये साकारू. शिरूर हे सांस्कृतिक वारशाचे केंद्र बनावे, यासाठी मी पूर्ण प्रयत्न करतोय,” असे आ. माऊली कटके यांनी नमूद केले.
शिरूर हे केवळ तालुक्याचे नव्हे तर संपूर्ण पुणे जिल्ह्याच्या उत्तर-पूर्व भागाचे केंद्र आहे. त्यामुळे येथे सर्वसामान्य नागरिक, विद्यार्थी, व्यापारी व उद्योजक यांच्या गरजा लक्षात घेऊन ‘सर्वांना सामावून घेणारे मॉडेल शिरूर’ उभारणार आहोत. ही फक्त योजना नाही, हा उपक्रम म्हणजे आमदार कटके यांची शिरूरकरांशी असलेली बांधिलकी आहे. असे ते म्हणाले.
