मुंबई: कुटुंबात नवीन सदस्याचे आगमन झाले आहे आणि त्याचे नाव शिधापत्रिकेत (रेशन कार्ड) समाविष्ट करायचे आहे? आता त्यासाठी सरकारी कार्यालयांच्या वारंवार फेऱ्या मारण्याची गरज नाही. राज्य सरकारच्या ऑनलाइन सुविधेमुळे घरबसल्या अर्ज करता येतो. तसेच इच्छुकांसाठी ऑफलाइन पर्यायही उपलब्ध आहे.
अर्जासाठी आवश्यक कागदपत्रे
नवीन सदस्याचे आधार कार्ड
जन्म प्रमाणपत्र किंवा विवाहानंतर नाव जोडत असल्यास विवाह प्रमाणपत्र
जुन्या रेशन कार्डमधून नाव वगळल्याचा दाखला (लागू असल्यास)
सध्याच्या रेशन कार्डची प्रत
नवीन सदस्याचा पासपोर्ट आकाराचा फोटो
आवश्यकतेनुसार संबंधित विभागाने मागितलेली इतर कागदपत्रे
ऑनलाइन अर्ज करण्याची प्रक्रिया
आपले सरकार (Aaple Sarkar) पोर्टल� वर जाऊन नवीन वापरकर्ता असल्यास नोंदणी करा आणि लॉग-इन करा.
‘अन्न, नागरी पुरवठा व ग्राहक संरक्षण विभाग’ निवडा.
‘शिधापत्रिकेत नवे नाव समाविष्ट करणे’ ही सेवा निवडा.
अर्जामध्ये नवीन सदस्याची वैयक्तिक माहिती, जन्मतारीख, आधार तपशील आणि आवश्यक माहिती भरून कागदपत्रे अपलोड करा.
लागू असलेले शुल्क ऑनलाइन भरून अर्ज सबमिट करा.
अर्ज सबमिट झाल्यानंतर मिळणारा Application ID सुरक्षित जतन करा. याच क्रमांकाद्वारे अर्जाची स्थिती ऑनलाइन तपासता येते.
ऑफलाइन अर्जाचा पर्याय ऑनलाइन अर्ज शक्य नसल्यास, जवळच्या तहसील कार्यालयात किंवा अन्न व नागरी पुरवठा विभागाच्या संबंधित कार्यालयात जाऊनही अर्ज करता येतो.
अर्ज करताना या गोष्टी लक्षात ठेवा
प्रकरणानुसार आवश्यक कागदपत्रांमध्ये बदल होऊ शकतो.
अर्जातील सर्व माहिती अचूक भरा.
अपलोड केलेल्या कागदपत्रांच्या प्रती स्पष्ट असाव्यात.
शुल्क आणि अद्ययावत नियम अधिकृत पोर्टलवर तपासूनच अर्ज करा.
रेशन कार्डमध्ये नवीन सदस्याचे नाव जोडण्याची प्रक्रिया आता अधिक सोपी झाली आहे. योग्य कागदपत्रांसह अर्ज केल्यास प्रक्रिया जलद पूर्ण होण्यास मदत होते.
