मुंबई: पुणे जिल्ह्यातील जुन्नर तालुक्यातील पिंपळवंडी येथे साडेनऊ वर्षांच्या चिमुकलीवर अत्याचार करून तिची हत्या करण्यात आल्याची धक्कादायक घटना समोर आली आहे. या घटनेची गंभीर दखल घेत उपमुख्यमंत्री सुनेत्रा अजित पवार यांनी पुणे जिल्ह्याचे पोलीस अधीक्षक संदीप सिंह गिल यांच्याशी दूरध्वनीवरून संवाद साधत तपासाचा आढावा घेतला.
या प्रकरणाची पारदर्शक आणि सखोल चौकशी करून आरोपीवर कठोर कारवाई करण्याचे स्पष्ट निर्देश पोलीस प्रशासनाला देण्यात आल्याचे सुनेत्रा पवार यांनी सांगितले. पोलिसांनी तत्परतेने कारवाई करत एका संशयित तरुणाला ताब्यात घेतले असून, पुढील तपास वेगाने सुरू आहे.
ही घटना अत्यंत निंदनीय असून माणुसकीला काळीमा फासणारी आहे. आरोपीला लवकरात लवकर कठोर शिक्षा मिळावी, यासाठी हा खटला जलदगती न्यायालयात चालविण्याची विशेष विनंती मुख्यमंत्री देवेंद्र फडणवीस यांच्याकडे करणार असल्याचेही सुनेत्रा पवार यांनी स्पष्ट केले.
पीडित कुटुंबाच्या पाठीशी शासन खंबीरपणे उभे असल्याचे सांगत, लवकरच स्वतः पिंपळवंडी येथे जाऊन पीडित कुटुंबाची भेट घेणार असल्याचे सुनेत्रा पवार यांनी सांगितले.
