पिंपरी-चिंचवड: शहरातून एक धक्कादायक घटना समोर आली असून, एका परप्रांतीय तरुणाने पत्नीपासून झालेल्या विभक्ततेच्या नैराश्यात फेसबुक लाईव्ह करत इमारतीवरून उडी मारून आत्महत्या केल्याची घटना घडली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, केसरी प्रसाद शाहू (वय अंदाजे …) असं आत्महत्या केलेल्या तरुणाचं नाव आहे. तो मूळचा मध्यप्रदेशमधील रहिवासी होता. मंगळवारी दुपारच्या सुमारास भोसरी परिसरात महापालिकेच्या रुग्णालयालगत असलेल्या भाजी मंडईच्या इमारतीवर केसरी उभा राहिला होता.
यावेळी त्याने फेसबुक लाईव्ह सुरू करत आपली व्यथा मांडली. पत्नी आपल्याला सोडून गेल्याने आपण तीव्र मानसिक तणावात असल्याचं त्याने सांगितलं. “माझं कोणी ऐकत नाही… मला फक्त माझ्या बायकोला एकदा भेटायचं आहे,” असं तो फेसबुक लाईव्हमध्ये बोलताना दिसतो.
पत्नीपासून दुरावल्यामुळे अस्वस्थ झालेल्या केसरीने अखेर फेसबुक लाईव्ह सुरू असतानाच इमारतीवरून उडी मारत जीवन संपवलं. घटनेची माहिती मिळताच पोलिसांनी तात्काळ घटनास्थळी धाव घेत पंचनामा केला. या प्रकरणी पुढील तपास सुरू असल्याचं पोलिसांनी सांगितलं आहे.या घटनेने परिसरात शोककळा पसरली असून, सोशल मीडियावरही या घटनेची मोठ्या प्रमाणात चर्चा होत आहे.
