मंचर (कैलास गायकवाड): खडकवाडी (ता. आंबेगाव जि. पुणे) येथील चौकामध्ये राजाराम विश्वनाथ रोकडे (वय 95 रा. वाळुंजनगर,आंबेगाव जि.पुणे) यांचा भरधाव डंपरच्या धडकने मृत्यू झाला आहे.
डंपर चालक फक्कड मारुती शेटे (वय 50 रा. संविदाणे, ता. शिरूर जि.पुणे) हा टाटा कंपनीचा डंपर गाडी नंबर एम एच 14 डीएम 64 50 चालवत होता. राजाराम विश्वनाथ रोकडे यांच्या पायावरून डंपर गेल्यामुळे ते गंभीर जखमी झाले होते. अपघात झाल्या नंतर खडकवाडीतील ग्रामस्थांनी अपघात ग्रस्त व्यक्तीला ताबडतोब लोणी येथील हॉस्पिटलमध्ये हलविले. पण, उपचारादरम्यान त्यांचा मृत्यू झाला आहे. पोलिस पुढील तपास करत आहेत.
ज्येष्ठ व्यक्ती राजाराम विश्वनाथ रोकडे हे जुन्या पिढीतील लोणी परिसरातील निष्णांत सुतार कारागीर होते. वाळुंजनगर ग्रामपंचायतचे माजी ग्रामपंचायत सदस्य होते. ते सकाळी पंढरपूरला जाण्याऐवजी धामणी खिंड येथील ज्ञानेश्वर मंदिरात दर्शनासाठी जात होते. त्यांच्या मागे एक मुलगा सेवानिवृत्त तलाठी शिवाजी रोकडे व चार मुली व पत्नी आहे.
सदर घटनेची तक्रार प्रशांत प्रताप रोकडे (रा. वाळुंज नगर) याने पारगाव (कारखाना) पोलिस स्टेशन मध्ये दिली आहे. गु. र. नं 113/2023भा. द.वि. क 304(2),279,338 मो. वा. क, क प्रमाणे सहाय्यक पोलिस निरीक्षक लहू थाटे यांच्या मार्गदर्शनाखाली पोलिस उपनिरीक्षक भाऊसाहेब लोकरे पुढील तपास करत आहेत.
