मुंबई: शनिवार (दि. ५) ऑगस्ट २०२३ रोजी अभिनेते अशोक सराफ आणि अभिनेत्री निर्मिती सावंत यांची प्रमुख भूमिका असलेल्या ‘व्हॅक्युम क्लिनर’ या नाटकांच्या प्रयोगाने यशवंतराव चव्हाण नाटय संकुल रंगमंदिराचा पडदा उघडला. विशेष म्हणजे ह्या प्रयोगातून मिळणाऱ्या उत्पन्नाचा मोठा हिस्सा इर्षाळवाडी दुर्घटनाग्रस्तांसाठी देण्याचा निर्णय या नाटकाचे निर्माते दिलीप जाधव यांनी घेतला.
तसेच रंगशारदा प्रतिष्ठानचे विजय गोखले आणि प्रशांत दामले फॅन फाऊंडेशन ह्या संस्थांनी देखील मदत जाहीर केली. ह्या प्रसंगी प्रथम तिकीट घेतलेल्या प्रेक्षकास अभिनेते अशोक सराफ ह्यांची स्वाक्षरी असलेले एक छोटे स्मृतिचिन्ह सुध्दा देण्यात आले. रजनी शशी प्रभू ह्यांच्या हस्ते अभिनेत्री निर्मिती सावंत ह्यांचा सत्कार करण्यात आला. अशोक सराफ ह्यांनी नाट्यगृह उत्तम झाल्याबद्दल कौतुक करत जास्तीत जास्त रसिक ह्या नाट्यगृहात येऊन विविध नाटकांचा आनंद घेतील, अशी आशा व्यक्त केली.
प्रशांत दामले ह्यांची अध्यक्षपदी निवड झाल्यानंतर नियामक मंडळ, विश्वस्त मंडळ यांच्या प्रयत्नातून नाट्यगृह नव्या रंगरुपात प्रेक्षकांच्या भेटीला आले आहे. याचा आनंद कलाक्षेत्रात होत आहे. प्रमुख कार्यवाह अजित भुरे, कोषाध्यक्ष सतीश लोटके, सेन्सॉर बोर्डाचे अध्यक्ष विजय गोखले व कल्याण नाट्यपरिषदचे शिवाजी शिंदे ह्या प्रयोगादरम्यान उपस्थित होते. ह्या नाट्यगृहाचा पडदा उघडल्याने नाट्यरसिक सुखावले.
