मुंबई : ‘फूल और कांटे’ या चित्रपटातून अभिनेता अजय देवगणला बॉलिवूडमध्ये लॉन्च करणारे ज्येष्ठ दिग्दर्शक कुकू कोहली यांचे निधन झाले. वयाच्या ७७व्या वर्षी त्यांनी अखेरचा श्वास घेतला. मंगळवारी सायंकाळी त्यांना हृदयविकाराचा झटका आल्याची माहिती समोर आली आहे. त्यांच्यावर कोकिलाबेन रुग्णालयात उपचार सुरू होते. मात्र, उपचारादरम्यान त्यांची प्राणज्योत मालवली. आज त्यांच्या पार्थिवावर अंत्यसंस्कार करण्यात आले.
निधनापूर्वी कुकू कोहली पत्नी अभिनेत्री अरुणा इराणी यांच्यासोबत फोनवर संवाद साधत होते. दोघांमध्ये गप्पाही सुरू होत्या. यावेळी कुकू कोहली यांनी पत्नीला, ‘जास्त अति करू नकोस’, असे शेवटचे शब्द सांगितल्याची माहिती समोर आली आहे. त्यानंतर त्यांची प्रकृती अचानक खालावली आणि त्यांनी प्रतिसाद देणे बंद केले. डॉक्टरांनी त्यांना वाचवण्याचे शर्थीचे प्रयत्न केले; मात्र त्यात यश आले नाही.
कुकू कोहली यांचे खरे नाव अवतार कोहली होते. ४ जून १९४९ रोजी जन्मलेल्या कुकू कोहली यांनी तीन दशकांहून अधिक काळ हिंदी चित्रपटसृष्टीत काम केले. दिग्दर्शक, लेखक, संपादक आणि पटकथालेखक म्हणून त्यांनी आपली वेगळी ओळख निर्माण केली.
कारकिर्दीच्या सुरुवातीला त्यांनी शोमन राज कपूर यांच्यासोबत सहाय्यक दिग्दर्शक म्हणून काम केले. ‘बॉबी’, ‘प्रेम रोग’ आणि ‘सत्यम शिवम सुंदरम’ यांसारख्या चित्रपटांमध्ये त्यांनी महत्त्वाची भूमिका बजावली. त्यानंतर सनी देओलच्या पदार्पणाच्या ‘बेताब’ चित्रपटात त्यांनी सेकंड युनिट डायरेक्टर म्हणून काम केले.
कुकू कोहली यांनी ‘सुहाग’, ‘हकीकत’, ‘कोहराम’, ‘जुल्मी’ आणि ‘अनाडी नंबर १’ यांसारख्या चित्रपटांचे दिग्दर्शन केले. ‘हकीकत’ या चित्रपटासाठी त्यांना सर्वोत्कृष्ट दिग्दर्शकाच्या पुरस्कारासाठी नामांकनही मिळाले होते.
कुकू कोहली यांच्या निधनाने हिंदी चित्रपटसृष्टीतील एक अनुभवी दिग्दर्शक हरपल्याची भावना व्यक्त होत आहे. त्यांच्या चित्रपटसृष्टीतील योगदानामुळे ते कायम स्मरणात राहतील.
