ठाणे: ठाण्यात घडलेल्या दुर्दैवी होर्डिंग दुर्घटनेची उपमुख्यमंत्री एकनाथ शिंदे यांनी गंभीर दखल घेत शहरातील सर्व अनधिकृत होर्डिंग्स तात्काळ हटविण्याचे आदेश ठाणे महानगरपालिका आयुक्तांना दिले आहेत.
याशिवाय, पावसाळ्यात वादळी वारे आणि मुसळधार पावसामुळे अशा प्रकारच्या दुर्घटना टाळण्यासाठी शहरातील सर्व मोठ्या होर्डिंग्सचे तातडीने स्ट्रक्चरल ऑडिट करण्याचे निर्देशही त्यांनी दिले आहेत. धोकादायक ठरणाऱ्या होर्डिंग्सवर त्वरित कारवाई करून बेकायदेशीर फलक उभारणाऱ्यांवर कठोर कायदेशीर कारवाई करण्याचे आदेशही शिंदे यांनी दिले.
उपमुख्यमंत्र्यांच्या निर्देशानंतर ठाणे महापालिका प्रशासन अॅक्शन मोडमध्ये आले असून, काल रात्रीपासूनच शहरातील अनधिकृत होर्डिंग्सविरोधात विशेष मोहीम सुरू करण्यात आली आहे. या कारवाईमुळे भविष्यात अशा दुर्घटना टाळण्यास मदत होईल, असा विश्वास प्रशासनाने व्यक्त केला आहे.
