पुणे: महापालिकेतील 20 वर्षे सफाई कर्मचारी म्हणून काम करणाऱ्या अशोक हिवराळे यांना एमआयएमने महापालिकेच्या प्रभाग क्रं 1 (अ) मधून उमेदवारी दिली आणि ते निवडून आले. आता एमआयएमचे नेते इम्तियाज जलील यांनी अशोक हिवराळे यांना थेट महापौरपदाची उमेदवारी देत दलित कार्ड पुढे केले आहे.
एमआयएमच्या 33 नगरसेवक निवडून आल्यामुळे हा पक्ष महापालिकेत दुसऱ्या क्रमांकाचा ठरला असून प्रमुख विरोधी पक्ष म्हणून पुढील पाच वर्ष काम करणार आहे. सर्वाधिक मुस्लिम नगरसेवक असलेल्या एमआयएमने दलित नगरसेवकाला उमेदवारी देऊन एक सामाजिक संदेश देण्याचा प्रयत्न केला आहे.
इम्तियाज जलील यांनी पालकमंत्री संजय शिरसाट यांच्याकडे आतून किंवा बाहेरून पाठिंबा देण्याची अपेक्षा व्यक्त केली आहे. तसेच, उपमहापौर पदावरून नाराज असलेल्या शिवसेनेच्या नगरसेवकांसाठी देखील एक पर्याय उपलब्ध करून देण्याचा इम्तियाज जलील यांनी इशारा दिला.
दरम्यान, इम्तियाज जलील यांनी स्वतःवर तिसऱ्या अपत्याच्या संदर्भातील तक्रारींबाबत सावध भूमिकाही घेतली असून, “माझ्या बाबतीत 2014 मध्येही अशीच परिस्थिती होती; मी दुसरी बायको आणि आणखी दोन मुलं शोधतोय,” असा टोला त्यांनी लगावला.
एमआयएमच्या महापौर उमेदवारीच्या या स्मार्ट खेळीमुळे पक्ष पुन्हा एकदा चर्चेत आला आहे, तरीही उपमुख्यमंत्री एकनाथ शिंदे यांनी महापौर संबंधित आदेशांचे पालन करण्याचे सक्त आदेश दिले असल्याने परिस्थिती गुंतागुंतीची आहे.
