मुंबई: विधिमंडळाचे कामकाज प्रत्यक्ष अनुभवण्यासाठी नीता मुकेश अंबानी शाळेतील सुमारे ६० विद्यार्थ्यांनी विधानभवनाला दिलेली अभ्यासक भेट उत्साहवर्धक ठरली. या वेळी उपसभापती डॉ. नीलम गोऱ्हे आणि महिला व बालविकास मंत्री आदिती तटकरे यांचा विद्यार्थ्यांशी झालेला संवाद विशेष आकर्षण ठरला.
डॉ. गोऱ्हे यांनी अत्यंत सोप्या भाषेत विधिमंडळाची कार्यपद्धती समजावून सांगताना शिस्त, नियम आणि सभागृहातील कामकाजाची रचना स्पष्ट केली. विद्यार्थ्यांनीही उत्सुकतेने प्रश्न विचारत संवाद रंगवला.
मंत्री आदिती तटकरे यांनी मुलांशी गप्पांच्या माध्यमातून शासनाचे महत्त्वाचे निर्णय आणि धोरणे समजावून सांगितली. तसेच अनिकेत तटकरे यांनी दोन्ही सभागृहांची सविस्तर माहिती दिली.या कार्यक्रमाला जनसंपर्क अधिकारी निलेश मदाने, संबंधित अधिकारी आणि शाळेचे प्रतिनिधी उपस्थित होते. विद्यार्थ्यांसाठी ही भेट केवळ शैक्षणिक न राहता लोकशाहीची कार्यपद्धती जवळून समजून घेण्याचा प्रेरणादायी अनुभव ठरली.
