राजगुरुनगर (प्रतिनिधी): वाफगाव (ता.खेड) येथे आकाशातुन अज्ञात वस्तु थेट जमिनिवर येत असताना पँराशुट फुटले व त्याच्या आवाजाने परिसरातील शेतकरी व नागरिकांमध्ये काहीवेळ खळबळ उडाली. हे सॅटेलाईटच्या निरिक्षकाचे उपकरण असल्याचा अंदाज वर्तवण्यात येत असून संबधित वस्तू पोलिसांनी पंचनामा करत ताब्यात घेतली. परंतु संबधित उपकरण हवामान विभागाचे असून कोणताही धोका नसल्याची माहिती हवामान विभागाने पत्राद्वारे दिल्याने सगळ्यांनाच दिलासा मिळाला. या उपकरणावर कोरियन भाषेतला मजकूर आढळुन आला.
खेड तालुक्यातील वाफगाव या गावामध्ये आकाशामधून अचानक एक उपकरण असल्यासारखी वस्तू जमिनीवर पडली ती पडत असताना या वास्तूला असलेला बलून फुटल्यामुळे मोठा आवाज झाला. त्यामुळे परिसरातील शेतकरी व नागरिकांना आवाज आल्यामुळे त्यांच्यात भीतीचे वातावरण पसरले होते पण हवामान विभाग व पोलीस यंत्रणेच्या खुलाशामुळे कसलाही धोका नसल्याची माहिती देण्यात आल्याने शेतकरी व नागरिकांनी सुटकेचा निःश्वास टाकला.
याबाबत सविस्तर मिळालेल्या माहितीनुसार खेड दि३१ मे रोजी सकाळी 8:30 च्या सुमारास वाफगाव येथील टाकळवाडी रोड येथील भरत शांताराम राम्हाणे यांच्या शेतात आकाशातुन एक छोटेसे मशिन पडले असून त्याला पांढऱ्या रंगाचा धागा व पुढे पांढऱ्या रंगाचा फुगा आहे अशी माहिती पोलीस हवालदार साबळे, शेळके व पोलीस कॉन्स्टेबल बांडे यांना मिळाली असता संबधित पोलीस कर्मचाऱ्यांनी व नागरिकांनी प्रत्यक्षात त्या मशिन जवळ जावुन पाहणी केली असता ते मशिन हवामान विभागाचे असावे असा प्राथमीक अंदाज करण्यात आला. पोलीस कर्मचाऱ्यांनी संबंधितांनी मशिनचे संपुर्ण फोटो काढुन मशिनची बारकाईने पाहणी केली असता सदरचे मशिन हे रेडीओसोंड डीटीआर ( RADIOSONDE DTR – WxR 301D) मशिन होते व ते हवामान मोजण्याचे मशिन असल्याची खात्री झाल्यानंतर ते मशिन ताब्यात घेतले.
सदर मशिनच्या बाबत पुणे ग्रामीणचे पोलीस अधिक्षक यांना व हवामान विभाग पुणे यांना माहिती दिली. हवामान विभाग पुणे यांना लेखी पत्राद्वारे कळविले. त्याबाबत हवामान विभागाचे अधिकारी टी सी मोहाडीकर यांनी सदरचे मशिन हे आमच्या विभागाकडील असुन ते तापमान, हवामानातील आद्रता, हवेचा दाब, उंची, हवेची दिशा, हवेचा वेग मोजण्यासाठी वापरण्यात येते. ते जमिनीपासुन 35 ते 40 किलोमीटरवर आकाशामध्ये कार्यक्षेत्रात काम करत असते ते आमचे दैनंदिन कामकाजातील भाग आहे. त्या मशिनपासुन कोणताही धोका नसुन ते परत वापरण्यास आयोग्य आहे असे त्यांनी लेखी पत्राव्दारे कळविलेले आहे.
