शिक्रापूर (शेरखान शेख): कासारी (ता. शिरुर) येथील नरकेवाडी सह पडाळी वस्ती येथील रस्त्यांची मोठ्या प्रमाणात दुरवस्था झालेली असल्यामुळे नागरिकांना मोठ्या प्रमाणात त्रास सहन करावा लागत असल्याने येथील रस्त्यांची दुरुस्ती करण्याची मागणी नागरिक करत आहे.
कासारी (ता. शिरुर) येथील नरकेवाडी सह पडाळी वस्ती येथील रस्त्यांवर खड्डे पडून पावसाच्या पाण्यामुळे चिखल होत आहे. रस्त्यावर होणाऱ्या चिखलामुळे येथून येणाऱ्या जाणाऱ्या नागरिकांसह शालेय विद्यार्थ्यांचे मोठ्या प्रमाणात हाल होत असून नागरिकांना जीव मुठीत घेऊन प्रवास करावा लागत आहे. तर अनेकदा दुचाक्या घसरुन लहान मोठे अपघात झाल्याच्या देखील घटना वारंवार घडत आहे.
त्यामुळे ग्रामपंचायत प्रशासनाने येथील रस्त्यांची दुरुस्ती करावी अन्यथा रस्त्यामध्ये झाडे लावून अनोखे आंदोलन केले जाईल, असा इशारा भारतीय जनता पार्टी ओबीसी मोर्चाचे जिल्हा चिटणीस नवनाथ भुजबळ यांनी दिला आहे.
ग्रामपंचायतकडे सध्या निधी शिल्लक नाही; वसंत पवार
कासारी ग्रामपंचायत कडे सध्या रस्त्यांवर मुरुमिकरण करण्यासाठी निधी शिल्लक नसून काहीतरी उपाययोजना करुन निधी उपलब्ध करुन रस्त्यावर मुरुमिकरण केले जाईल, असे ग्रामविकास अधिकारी वसंत पवार यांनी सांगितले.
