मुंबई: विविध क्षेत्रांत उल्लेखनीय कार्य करणाऱ्या व्यक्तींच्या नावांची पद्म पुरस्कार 2027 साठी शिफारस करण्यासाठी राज्य शासनाने राजशिष्टाचार मंत्री जयकुमार रावल यांच्या अध्यक्षतेखाली राज्यस्तरीय समिती स्थापन केली आहे. केंद्र सरकारच्या निर्देशानुसार गठीत करण्यात आलेल्या या समितीवर प्रजासत्ताक दिन 26 जानेवारी 2027 रोजी जाहीर होणाऱ्या पद्म पुरस्कारांसाठी पात्र व्यक्तींची नावे केंद्र शासनाकडे पाठविण्याची जबाबदारी सोपविण्यात आली आहे. यासंदर्भातील शासन निर्णय जारी करण्यात आला आहे.
या समितीत वैद्यकीय शिक्षण मंत्री हसन मुश्रीफ, शालेय शिक्षण मंत्री दादाजी भुसे, उद्योग व मराठी भाषा मंत्री उदय सामंत, पर्यावरण व वातावरणीय बदल मंत्री पंकजा मुंडे, महिला व बालविकास मंत्री आदिती तटकरे तसेच सार्वजनिक बांधकाम मंत्री शिवेंद्रसिंह भोसले यांचा सदस्य म्हणून समावेश आहे.
सदर समिती विविध माध्यमांतून प्राप्त प्रस्तावांची छाननी करून पात्र मान्यवरांची नावे राज्य शासनाकडे शिफारसीसाठी सादर करणार आहे.
