मुंबई: मनोहर ऊर्फ संभाजी भिडे हे नेहमीच राष्ट्रपुरुषांबद्दल वादग्रस्त वक्तव्य करत असून त्याचा निषेध म्हणून मुंबई विभागीय राष्ट्रवादी काँग्रेसच्या वतीने मंत्रालयाजवळील महात्मा गांधी यांच्या पुतळ्यासमोर आज मूक आंदोलन करण्यात आले.
मुंबई विभागीय राष्ट्रवादी काँग्रेसचे कार्याध्यक्ष नरेंद्र राणे यांच्या नेतृत्वाखाली हाताला काळ्या पट्ट्या बांधून हे मूक आंदोलन करण्यात आले. मनोहर ऊर्फ संभाजी भिडे हे वादग्रस्त वक्तव्य करून राज्यातील वातावरण बिघडवत आहेत. त्यांच्या अशा वादग्रस्त वक्तव्याचा निषेध म्हणून मुंबई विभागीय राष्ट्रवादी काँग्रेसच्यावतीने आज करण्यात आलेल्या मूक आंदोलनात राष्ट्रवादीचे मोठ्या संख्येने कार्यकर्ते व पदाधिकारी उपस्थित होते.
