रांजणगाव गणपती: रांजणगाव MIDC त ढोकसांगवी गावच्या हद्दीत न्यानको कंपनी समोर माथाडीच्या बोगस पावत्या बनवुन पैसे वसुल करत असल्याचे फोटो व व्हिडीओ काढल्यामुळे एका पत्रकाराला अडवून शिवीगाळ व दमबाजी करत त्या पत्रकाराच्या मोबाईल मधील व्हिडिओ शूटिंग व फोटो डिलीट करण्याची घटना घडली असुन त्या संबंधित पत्रकाराने याबाबत रांजणगाव MIDC पोलिस ठाण्यात तक्रार दाखल केली असुन अजित इटनर व अन्य दोन जणांविरोध गुन्हा दाखल झाला आहे.
याबाबत रांजणगाव MIDC पोलिसांनी दिलेल्या माहितीनुसार फिर्यादी पत्रकार हा आज 10:45 च्या सुमारास रांजणगाव MIDC तील ढोकसांगवी गावच्या हद्दीत असणाऱ्या न्यानको कंपनी समोरुन जात असताना पांढऱ्या रंगाच्या कार मधुन आलेल्या दोन अनोळखी व्यक्तींनी त्याला अडवून शिवीगाळ व दमदाटी केली. तसेच त्यातील एकजण जवळच असलेल्या झाडाची फांदी मोडून फिर्यादीच्या अंगावर धावून आला. त्यानंतर दुसऱ्या एका चारचाकी गाडीतून अजित इटनर हा आला आणि त्यानेही या पत्रकारास दमदाटी केली.
तसेच तु कोणाला विचारुन फोटो आणि व्हिडिओ काढले. असे म्हणतं मोबाईल मधील फोटो आणि व्हिडिओ डिलीट केले. तसेच यापुढे गावात यायचं असेल तर सरपंचांला विचारुन यायचं नाहीतर हातपाय काढु तु परत माघारी जाणार नाहीस अशी धमकी दिली. त्यामुळे अजित इटनर आणि इतर दोन जणांविरोधात पोलिसांनी गुन्हा दाखल केला आहे.
