शिरूर येथे भीषण अपघात; डंपरच्या धडकेत दोन जणांचा मृत्यू, एक गंभीर जखमी

शिरूर (अरुणकुमार मोटे): मांडवगण फराटा ( ता. शिरूर) येथे दिनांक १७ मे रोजी रात्री ८ वाजण्याच्या सुमारास भीषण अपघातात दोन जणांचा दुर्दैवी मृत्यू झाला असून एकजण गंभीर जखमी झाला आहे. सदर अपघात मांडवगण फराटा ते वडगाव रासाई जाणाऱ्या रस्त्यावर रोहीदास थोरात यांच्या घराजवळ घडला.

या अपघातात मृत झालेले व्यक्ती म्हणजे सागर संभाजी कोळपे (वय 28), रा. मांडवगण फराटा, ता. शिरूर) आणि यश सुधाकर भिसे (वय 12), सध्या रा. मांडवगण फराटा, मुळ रा. खेडवाडी, ता. गेवराई, जि. बीड) हे असून, अनिल बीरा कोळपे हे अपघातात गंभीर जखमी झाले आहेत.

फिर्यादी दादा बाळासो कोळपे (वय 38), रा. कोळपेवस्ती, मांडवगण फराटा) यांनी शिरूर पोलीस ठाण्यात दिलेल्या तक्रारीनुसार, डंपर क्रमांक MH 42 SEQ 7696 या वाहनाच्या अज्ञात चालकाने वाहन हायगाईने, अविचाराने आणि भरधाव वेगात चालवत समोरून येणाऱ्या पीकअप क्रमांक MH 03 OE 0638 ला रॉंग साईडने धडक दिली. त्यामुळे सागर कोळपे आणि यश भिसे यांचा जागीच मृत्यू झाला तर अनिल कोळपे जखमी झाले. अपघात घडल्यानंतर डंपर चालक अपघातस्थळावरून न थांबता पळून गेला.

या प्रकरणी शिरूर पोलीस ठाण्यात गुन्हा क्र. 341/2025 अन्वये भारतीय दंड संहिता कलम 279, 304(अ), 337, 338, 427, मोटार वाहन कायदा कलम 184, 134/177 नुसार गुन्हा दाखल करण्यात आला आहे.या प्रकरणाचा पुढील तपास पोलीस उपनिरीक्षक नकाते यांच्याकडे असून, प्रभारी अधिकारी संदेश केंजळे, पोलीस निरीक्षक, शिरूर पोलीस स्टेशन हे मार्गदर्शन करत आहेत.