पाटणा: चोरी झाली की चोराला पकडा चोराला पकडा असं इतर लोक ओरडतात. पण सध्या सोशल मीडियावर असा व्हिडीओ व्हायरल होतो आहे, ज्यात स्वतः चोरच मला पकडा, सोडू नका, धरुन ठेवा, असं ओरडताना दिसला.
ट्रेनमध्ये मोबाईल चोरी करायला गेलेल्या या चोरट्यासोबत असं काही घडलं की तो प्रवाशांकडे आपल्या जीवाची भीक मागू लागला. सोशल मीडियावर ट्रेनमध्ये मोबाईल चोरणाऱ्या या चोराचा व्हिडीओ व्हायरल होतो आहे. ट्रेनमध्ये मोबाईल चोरीची प्रकरण काही नवीन नाहीत. चालत्या ट्रेनच्या दरवाजा किंवा खिडकीतील प्रवाशांच्या मोबाईलवर चोरटे डल्ला मारतात.
प्रवासी कितीही सतर्क असले तरी चोरटे आपला डाव साधतातच. पण मोबाईल चोरीचा चोरट्यांचा हा प्रयत्न प्रत्येक वेळी यशस्वी होईलच असं नाही. अशाच मोबाईल चोराला प्रवाशांनी पकडलं आणि त्याला अशी भयंकर शिक्षा मिळाली की पाहून तुम्हालाही धडकी भरेल. फोटोत पाहू शकता चोर ट्रेनच्या खिडकीला लटकताना दिसतो आहे आणि ट्रेन सुसाट धावते आहे.
ट्रेनच्या आत चोराचे दोन्ही हात आहेत. दोन्ही बाजूंनी 2 प्रवाशांनी त्या चोराचा एक एक हात धरला आहे. चोरटा खिडकीबाहेर मोठमोठ्याने ओरडतो आहे. माझा हात सोडू नका, माझा हात सोडू नका असं तो सांगतो आहे. मोबाईल चोरायला आलेला चोर आपल्या जीवाची भीक मागतो आहे.
