जिल्हाधिकारी डॉ. राजेश देशमुख यांनी घेतला नियोजनाचा आढावा
शिक्रापूर (शेरखान शेख): कोरेगाव भीमा (ता. शिरुर) सह पेरणे फाटा येथे एक जानेवारी २०२३ या शौर्यदिनी आयोजित जयस्तंभ अभिवादन सोहळ्याची तयारी अंतिम टप्यात असून पोलीस आयुक्त रितेश कुमार व पुणे जिल्हाधिकारी डॉ. राजेश देशमुख यांनी जयस्तंभ परिसराला भेट देऊन सोहळ्याच्या नियोजनाचा आढावा घेतला आहे.
कोरेगाव भीमा (ता. शिरुर) सह पेरणे फाटा येथील विजयस्तंभ अभिवादन सोहळ्याच्या तयारीचा आढावा घेताना पोलीस आयुक्त रितेश कुमार व पुणे जिल्हाधिकारी डॉ. राजेश देशमुख यांच्यासह पोलीस सह आयुक्त संदीप कर्णिक, अतिरिक्त पोलीस आयुक्त रंजन कुमार शर्मा, मुख्य कार्यकारी अधिकारी चंद्रकांत वाघमारे, उपविभागीय अधिकारी संजय आसवले, तहसीलदार किरण सुरवसे यांसह आदी उपस्थित होते.
यावेळी बोलताना अभिवादनासाठी येणाऱ्या अनुयायांसाठी पिण्याच्या पाण्याचे टँकर, शौचालय, वाहनतळ, रुग्णवाहिका, अग्निशमन वाहन तसेच आरोग्य विभागाच्या वतीने औषधे, मास्क आदी सुविधा उपलब्ध करुन देण्यात आल्या असून एकूणच सर्व विभागाच्या वतीने नियोजना प्रमाणे करण्यात येत आहेत.
तसेच शनिवारपर्यंत सर्व तयारी पूर्ण करण्याच्या सूचना जिल्हाधिकारी डॉ. राजेश देशमुख यांनी सर्व अधिकाऱ्यांना दिल्या आहे. तर जयस्तंभास अभिवादन करण्यासाठी येणाऱ्या अनुयायांची संख्या लक्षात घेता अतिरिक्त अधिकारी व कर्मचाऱ्यांची नियुक्ती करण्यात आलेली आहे. राज्य राखीव दलाच्या ७ तुकड्या बंदोबस्तासाठी नेमण्यात आलेल्या आहेत. पोलीस विभागाच्या वतीने उत्तम पद्धतीने बंदोबस्त करण्यात येणार असून नागरिकांनी पोलीस प्रशासनास सहकार्य करण्याचे आवाहन पोलीस आयुक्त रितेश कुमार यांनी केले आहे.
सार्वजनिक बांधकाम विभागाचे मुख्य अभियंता अतुल चव्हाण व कार्यकारी अभियंता अजय भोसले यांच्या मार्गदर्शनाखाली परिसरात सुविधा निर्माण करण्यात येत असून जयस्तंभ फुलांनी सजविण्यात येत आहे. चारही बाजुंनी बॅरिकेट तसेच महिलांसाठी हिरकणी कक्ष आणि स्वतंत्र तात्पुरत्या स्वच्छता गृहाची व्यवस्था करण्यात आली असून परिसरात नियंत्रण कक्ष उभारण्यात आला असून पोलीस बंदोबस्तही ठेवण्यात आला आहे.
