मुंबई : ज्येष्ठ पत्रकार, राजकीय विश्लेषक आणि स्तंभलेखक डॉ. सुकृत खांडेकर यांनी वयाची ७५ वर्षे पूर्ण करून अमृतमहोत्सवी वर्षात पदार्पण केले आहे. यानिमित्त ज्येष्ठ राजकीय विश्लेषक योगेश वसंत त्रिवेदी यांनी त्यांच्या पत्रकारितेतील प्रदीर्घ आणि उल्लेखनीय योगदानाचा गौरव करणारा लेख प्रसिद्ध केला आहे.
डॉ. खांडेकर यांनी केसरी, लोकसत्ता, महाराष्ट्र टाइम्स, नवशक्ती तसेच प्रहारसारख्या वृत्तपत्रांत महत्त्वाच्या जबाबदाऱ्या सांभाळल्या. मंत्रालय आणि विधिमंडळ वार्तांकनात त्यांनी स्वतंत्र ओळख निर्माण केली. मंत्रालय व विधिमंडळ वार्ताहर संघ तसेच अखिल भारतीय मराठी पत्रकार परिषदेसारख्या संघटनांमध्ये त्यांनी नेतृत्व केले.
शिवसेनेचे मुखपत्र सामना या दैनिकावर संशोधन करून त्यांनी पीएच.डी. प्राप्त केली. सध्या ते स्टेटलाइन, इंडिया कॉलिंग आणि बॉम्बे कॉलिंग या लोकप्रिय स्तंभांमधून समकालीन राजकीय व सामाजिक घडामोडींवर परखड भाष्य करत आहेत.
योगेश त्रिवेदी यांनी आपल्या लेखात डॉ. खांडेकर यांच्या सौजन्यपूर्ण स्वभाव, अभ्यासू वृत्ती आणि निर्भीड लेखनशैलीचा गौरव करत, त्यांच्या अमृतमहोत्सवी वर्षानिमित्त विविध पत्रकार संघटनांनी त्यांचा जाहीर सत्कार करावा, अशी अपेक्षाही व्यक्त केली आहे.
मराठी पत्रकारितेत मोलाचे योगदान देणाऱ्या डॉ. सुकृत खांडेकर यांना निरोगी, दीर्घायुष्य लाभावे आणि त्यांचे मार्गदर्शन पुढील पिढीतील पत्रकारांना लाभत राहावे, अशा शुभेच्छाही लेखाच्या माध्यमातून व्यक्त करण्यात आल्या आहेत.
