मुंबई: एम. फील. अर्हता धारक अध्यापकांना कॅसचे लाभ लागू करण्याबाबत महाराष्ट्र राज्य एम. फिल. पात्रताधारक प्राध्यापक संघर्ष समितीने उच्च व तंत्रशिक्षण मंत्री चंद्रकांत पाटील यांना निवेदन दिले होते. या निवेदनावर आज संघर्ष समितीच्या पदाधिकाऱ्यांसोबत मंत्रालय मुंबई येथे चर्चा झाली.
विद्यापीठ अनुदान आयोग (युजीसी) च्या (दि. 5) सप्टेंबर 2022 रोजीच्या पत्रानुसार, अध्यापकांना कॅस चे लाभ देण्याबाबत उच्च व तंत्रशिक्षण मंत्री चंद्रकांत पाटील यांनी पुढाकार घेऊन नोव्हेंबर 2022 मध्ये सकारात्मक भूमिका घेत विभागाला आवश्यक सूचना दिल्या होत्या त्यानुसार, बहुतांश एम.फील. पदवीधारक अध्यापकांना लाभ देण्यात आले मात्र काही मागण्या विचाराधीन होत्या. त्याबाबत विस्तृत चर्चा होऊन (दि .11) जुलै 2009 पर्यंत सेवेत असताना एम. फिल. केलेल्या सर्व अध्यापकांना कॅसचे लाभ देण्यासंबंधी विद्यापीठ अनुदान आयोगाकडे मार्गदर्शन मागवून अशा सर्व अध्यापकांना लाभ देण्यात यावे, अशा उच्च व तंत्रशिक्षण मंत्री चंद्रकांत दादा पाटील यांनी सूचना दिल्या.
यावेळी उच्च व तंत्र शिक्षण विभागाचे उप सचिव अजित बाविस्कर,महाराष्ट्र राज्य एम.फील. पात्रताधारक प्राध्यापक संघर्ष समितीचे अध्यक्ष डॉ निलेंद्र लोखंडे, डॉ.सचिन गोसावी, डॉ.रमाकांत पाटील ,डॉ.सविता तायडे,डॉ.लता चव्हाण, डॉ. ज्ञानेश्वर बोराडे,डॉ.अभिजित पवार व इतर संबंधित अधिकारी उपस्थित होते.
