नलगोंडा : तेलंगणातील नलगोंडा जिल्ह्यात मुख्याध्यापिकेच्या हत्येचे गूढ उकलण्यात पोलिसांना यश आले आहे. शाळेतीलच दहावीच्या दोन अल्पवयीन विद्यार्थ्यांनी फीची रक्कम लुटण्यासाठी मुख्याध्यापिका रुपा रेड्डी यांची हत्या केल्याची धक्कादायक माहिती तपासातून समोर आली आहे. या प्रकरणामुळे परिसरात खळबळ उडाली आहे.
पोलिसांच्या माहितीनुसार, ११ ऑगस्ट रोजी शाळेची फी जमा झाल्याची माहिती दोन्ही विद्यार्थ्यांना मिळाली होती. ही रक्कम रुपा रेड्डी यांच्या घरी असण्याची शक्यता असल्याने दोघांनी ती लुटण्याचा कट रचला. मास्क आणि हुडी घालून दोघे त्यांच्या घरात पोहोचले. त्यापैकी एक विद्यार्थी घरात शिरला, तर दुसरा बाहेर पहारा देत उभा राहिला.
घरात प्रवेश केल्यानंतर रुपा रेड्डी एका नातेवाइकासोबत फोनवर बोलत होत्या. त्याचवेळी आरोपी विद्यार्थ्याच्या चेहऱ्यावरील मास्क खाली आला आणि त्यांनी त्याला ओळखले. त्यांनी त्याला ‘बाबू’ असे संबोधले. हा शब्द फोनवरील संभाषणातही नोंदला गेला. आपली ओळख पटल्याने घाबरलेल्या विद्यार्थ्याने रुपा रेड्डी यांच्यावर चाकूने हल्ला केला. पोलिसांच्या माहितीनुसार, या हल्ल्यात त्यांचा मृत्यू झाला.
यानंतर आरोपी विद्यार्थ्याने घरातून सुमारे २ लाख २० हजार रुपये घेतले आणि बाहेर उभ्या असलेल्या साथीदाराला त्यातील ४० हजार रुपये दिले.
‘बाबू’ शब्द ठरला तपासातील महत्त्वाचा धागा
नलगोंडाचे एसपी शरत चंद्र पवार यांच्या माहितीनुसार, पोलिसांनी तपासाची सुरुवात रुपा रेड्डी कोणाला ‘बाबू’ म्हणत असत, याचा शोध घेण्यापासून केली. तपासादरम्यान पोलिसांचा संशय शाळेतील काही विद्यार्थ्यांवर गेला. सुरुवातीला दहावीतील पाच विद्यार्थ्यांची चौकशी करण्यात आली. त्यापैकी दोन विद्यार्थ्यांचे वर्तन संशयास्पद आढळून आले.
हत्येनंतरच्या काही दिवसांत या दोन्ही विद्यार्थ्यांनी मोठ्या प्रमाणात पैसे खर्च केल्याचेही पोलिसांच्या निदर्शनास आले. त्यामुळे त्यांची सखोल चौकशी करण्यात आली.
रक्ताचे डाग असलेल्या नोटांमुळे संशय बळावला
तपासादरम्यान एका विद्यार्थ्याकडून पोलिसांनी सुमारे १.५४ लाख रुपये जप्त केले. सुरुवातीला त्याने ही रक्कम आई-वडिलांनी दिल्याचा दावा केला. मात्र, या नोटांपैकी काही नोटांवर रक्ताचे डाग आढळल्याने पोलिसांचा संशय अधिकच बळावला.
पोलिसांनी उपलब्ध पुरावे विद्यार्थ्यांसमोर ठेवल्यानंतर दोघांनी चोरी आणि हत्येची कबुली दिल्याचे पोलिसांनी सांगितले.
चाकू, मास्क आणि मोबाईल जप्त
पोलिसांनी आरोपींकडून सुमारे १.५४ लाख रुपये रोख, तीन मोबाईल फोन, चाकू, ग्लोव्हज आणि मास्क जप्त केले आहेत. यातील एका विद्यार्थ्याने हत्येच्या सुमारे २० दिवस आधी आयफोन खरेदी केल्याचेही समोर आले आहे. या खरेदीचा चोरीच्या पैशांशी काही संबंध आहे का, याचा तपास सुरू आहे.
दोन्ही विद्यार्थ्यांनी यापूर्वीही छोट्या-मोठ्या चोऱ्या केल्याचे तपासात समोर आले आहे. पार्टी, मौजमजा, महागड्या वस्तू आणि बाईकसाठी पैसे मिळवण्याची त्यांची इच्छा होती. तसेच सोशल मीडिया आणि युट्यूबवरून झटपट पैसे कमावण्याचे मार्ग ते शोधत असल्याचेही पोलिसांच्या तपासात निष्पन्न झाले आहे.
सीसीटीव्ही आणि फॉरेन्सिक पुराव्यांची तपासणी
या प्रकरणात पोलिसांनी सीसीटीव्ही फुटेज, फॉरेन्सिक पुरावे आणि तांत्रिक माहितीच्या आधारे तपास केला आहे. या पुराव्यांच्या आधारे गुन्ह्याची संपूर्ण साखळी स्पष्ट करण्याचा प्रयत्न सुरू आहे.
दोन्ही आरोपी अल्पवयीन असल्याने त्यांच्यावर किशोर न्याय कायद्यानुसार कारवाई करण्यात येत आहे. या हत्येच्या कटामागे आणखी कोणाचा सहभाग आहे का, याचाही तपास पोलिसांकडून सुरू आहे.
