मुंबई : घरातील इलेक्ट्रिक मीटर म्हणजे केवळ किती युनिट वीज वापरली याची नोंद करणारे उपकरण नाही. आधुनिक विद्युत मीटरमध्ये काही संकेत देणारे फीचर्सही असतात. त्यापैकीच एक म्हणजे मीटरवर दिसणारी लाल पल्स एलईडी लाईट. या दिव्याच्या ब्लिंक होण्याच्या गतीवरून त्या क्षणी घरातील वीजवापर किती आहे, याची प्राथमिक कल्पना येऊ शकते.
अनेकांच्या घरातील इलेक्ट्रिक मीटरवर असलेली लाल एलईडी लाईट नेहमीपेक्षा अचानक वेगाने ब्लिंक होताना दिसते. अशावेळी घाबरण्यापेक्षा सर्वप्रथम घरातील वीजवापर तपासणे गरजेचे आहे. कारण साधारणपणे वीजवापर वाढला की मीटरवरील पल्स इंडिकेटर अधिक वेगाने ब्लिंक करू शकतो.
एकाचवेळी अनेक उपकरणे सुरू असतील तर काय होते?
घरातील एसी, गिझर, हीटर, इस्त्री, मायक्रोवेव्ह, पाण्याची मोटार यांसारखी तुलनेने जास्त वीज वापरणारी उपकरणे एकाचवेळी सुरू असतील, तर त्या वेळी विजेचा वापर वाढतो. त्यामुळे मीटरवरील पल्स एलईडी वेगाने ब्लिंक होताना दिसू शकते.
याउलट, घरातील बहुतांश किंवा सर्व उपकरणे बंद केल्यानंतर वीजवापर कमी झाल्यास ही लाईट तुलनेने कमी वारंवारतेने ब्लिंक करताना दिसू शकते.
उपकरणे बंद असतानाही लाल दिवा वेगाने ब्लिंक होतोय?
हा मुद्दा मात्र तपासण्यासारखा आहे. घरातील सर्व उपकरणे बंद केल्यानंतरही मीटरवरील पल्स इंडिकेटर अपेक्षेपेक्षा वेगाने ब्लिंक होत असेल, तर घरातील एखाद्या सर्किटमध्ये अनपेक्षित वीजवापर, वायरिंगमधील समस्या किंवा अन्य तांत्रिक कारण असण्याची शक्यता तपासावी.
मात्र केवळ लाल एलईडी वेगाने ब्लिंक होत आहे म्हणून मीटरमध्येच बिघाड आहे, असा थेट निष्कर्ष काढता येत नाही. मीटरची पल्स एलईडी विशिष्ट ऊर्जा वापराच्या प्रमाणानुसार ब्लिंक करण्यासाठी असते आणि प्रत्येक मीटरची ‘पल्स रेट’ वेगळी असू शकते.
मग नेमक काय करायच
जर तुम्हाला घरातील वीजवापर अनावश्यकपणे वाढल्याचा संशय असेल, तर प्रथम घरातील सर्व उपकरणे तपासा. उपकरणे बंद केल्यानंतरही वीजवापर सुरू असल्याचे जाणवत असेल, तर मीटर, वायरिंग किंवा घरातील सर्किटची तपासणी अधिकृत वीजतज्ज्ञाकडून करून घ्या.
मीटरमध्येच काही बिघाड असल्याचा संशय असल्यास संबंधित वीज वितरण कंपनीकडे तक्रार नोंदवून मीटरची तपासणी करून घेणे हा सुरक्षित पर्याय आहे.त्यामुळे पुढच्या वेळी तुमच्या इलेक्ट्रिक मीटरवरील लाल दिवा वेगाने ब्लिंक करताना दिसला, तर त्याकडे दुर्लक्ष करू नका. मात्र त्याचा अर्थ थेट ‘मीटर खराब आहे’ असा न लावता, सर्वप्रथम तुमच्या घरातील प्रत्यक्ष वीजवापर तपासा.
