शिक्रापूर (शेरखान शेख): शिक्रापूर (ता. शिरुर) येथील तळेगाव रोड परिसरात असलेल्या एका दुकानात भर दिवसा भलीमोठी घोरपड शिरल्याने दुकानदाराची चांगलीच तारांबळ उडाली. मात्र प्राणीमित्रांनी सदर घोरपडीला पकडल्याने दुकानदाराने सुटकेचा निश्वास टाकला तर घोरपडीला देखील जीवदान मिळाले आहे.
शिक्रापूर (ता. शिरुर) येथील तळेगाव रोड लगत असलेल्या साई सुगंधालय दुकानात भर दुपारच्या सुमारास एक भलीमोठी घोरपड शिरली यावेळी दुकानातील ग्राहकांसह दुकानदाराची चांगलीच तारांबळ उडाली. दरम्यान दुकान चालक प्रवीण भुजबळ यांनी इंडिया बुक रेकॉर्ड नोंद सर्पमित्र शेरखान शेख यांना दिली असता शेरखान शेख व अमोल कुसाळकर यांनी सदर ठिकाणी धाव घेत दुकानाची पाहणी करुन सदर घोरपडीला मोठ्या शिताफीने ताब्यात घेतले.
यावेळी सध्या उन्हाच्या तीव्रतेने तसेच भक्षाच्या शोधात वन्यजीव मनुष्यवस्तीत येत असल्याचे इंडिया बुक रेकॉर्ड नोंद सर्पमित्र शेरखान शेख यांनी सांगितले, तर याबाबत ची माहिती शिरुर वनविभागाचे वनरक्षक प्रमोद पाटील यांना देत घोरपडीला निसर्गाच्या सानिध्यात मुक्त करण्यात आले.
