शिरुर (तेजस फडके): नुकतीच महाराष्ट्र राज्याची राजधानी असलेल्या मुंबई शहरातील सावित्रीबाई फुले शासकीय महिला वस्ती गृहामध्ये एका मुलीचा बलात्कार करुन खून झाल्याची घटना घडलेली आहे. याच पार्श्वभूमीवर शिरुर तालुक्यातील सर्व शासकीय महिला वसतिगृहे तसेच खासगी महिला वस्तीगृहे या मध्ये नियमानुसार सी सी टी वी, महिला सुरक्षा रक्षक, तक्रार पेटी आणि स्थानिक पोलीस स्टेशन चा नंबर असणे आवश्यक झालेले आहे. त्यामुळे शिरुर तालुक्यातील सर्व शासकीय आणि खासगी महिला वस्तीगृहांचे सुरक्षा ऑडीट करण्याची मागणी अखिल भारतीय मराठा महासंघाच्या वतीने करण्यात आली आहे.
याबाबत शिरुरचे तहसिलदार बाळासाहेब म्हस्के आणि शिरुरचे उपविभागीय अधिकारी यशवंत गवारी यांना अखिल भारतीय मराठा महासंघाच्या वतीने निवेदन देण्यात आले. यावेळी अखिल भारतीय मराठा महासंघाच्या पश्चिम महाराष्ट्र सरचिटणीस शोभना पाचंगे, पुणे जिल्हाध्यक्ष शैलजा दुर्गे, पुणे जिल्हा सरचिटणीस भास्कर पुंडे, जिल्हा उपाध्यक्ष गणेश शिंदे, युवक मराठा महासंघाचे पुणे जिल्हा कार्याध्यक्ष अविनाश जाधव, जिल्हा उपाध्यक्ष अभिषेक शेळके, सामाजिक कार्यकर्त्या राणी कर्डीले, वंदना पोटे यावेळी उपस्थित होते.
शिरुर तालुका शैक्षणिक व औद्योगिक क्षेत्रात महिलांसाठी व मुलींसाठी सुरक्षित आहे हे समाजापुढे आले पाहिजे. त्यामुळे महिला किंवा मुलींच्या बाबत एखादा गैरप्रकार किंवा दुर्घटना घडण्या आधीच महिला व युवती सुरक्षितते बाबत शिरुर तालुका प्रशासन सक्रीय आहे असा संदेश राज्यात जाणार आहे. त्यामुळे शिरुर तालुक्यातील सर्व शासकीय आणि खासगी महिला वस्तीगृहांचे सुरक्षा ऑडीट करण्याची मागणी अखिल भारतीय मराठा महासंघाच्या वतीने करण्यात आल्याचे पुणे जिल्हा सरचिटणीस भास्कर पुंडे यांनी सांगितले.
