शिरूर पोलिस स्टेशनमध्ये गुन्हा दाखल
शिरूर (अरूणकुमार मोटे): शिरूर तालुक्यातील निमगाव दुडे येथे एका तरुणास तिघा जणांनी लोखंडी रॉड, दगड आणि लाथाबुक्क्यांनी मारहाण करत जखमी केले. या प्रकरणी शिरूर पोलीस स्टेशनमध्ये गुन्हा दाखल करण्यात आला आहे.
सचिन नारायण पानगे (वय २८), व्यवसाय – शेती, रा. निमगाव दुडे यांनी दिलेल्या तक्रारीनुसार, दिनांक २५मार्च रोजी सायंकाळी ५.३० वाजण्याच्या सुमारास ते त्यांच्या घराच्या समोर असलेल्या पत्र्याच्या शेडमध्ये आराम करत होते. त्यावेळी आरोपी भागा यशवंत हजारे, नवनाथ भागा हजारे, आणि मच्छिंद्र भागा हजारे हे तिथे आले.
नवनाथ हजारे याने फिर्यादीला विचारले की, “तू माझ्या वडिलांना सकाळी शेतामध्ये का बोललेस?” यावरून वाद उफाळला. नवनाथ हजारे याने हातातील लोखंडी रॉडने फिर्यादीच्या पाठीत जोरदार मारले. त्यानंतर मच्छिंद्र हजारे आणि भागा हजारे यांनी लाथाबुक्क्यांनी मारहाण केली. यावेळी नवनाथ हजारे याने पुन्हा लोखंडी रॉडने फिर्यादीच्या पाठीला, कमरेच्या खाली, पायाला आणि मानेवर मारहाण करत शिवीगाळ केली आणि जिवे मारण्याची धमकी दिली.
दरम्यान, मच्छिंद्र हजारे याने तेथील दगड उचलून फिर्यादीच्या दिशेने भिरकावला, जो त्यांच्या डाव्या गुडघ्याच्या खाली लागून जखमी झाला. या हल्ल्यात फिर्यादीला दुखापत झाली असून, त्यांनी आरोपींविरोधात फिर्याद दिली आहे.या घटनेचा पुढील तपास टाकळी हाजी आऊट पोस्टचे पोलीस हवालदार आगलावे हे करत आहे
