रांजणगाव गणपती: श्रावण महिन्यातील तिसऱ्या सोमवारानिमित्त पिंपरी दुमाला (ता. शिरूर) येथील प्रसिद्ध सोमेश्वर मंदिरात पहाटेपासूनच दर्शनासाठी भाविकांची मोठी गर्दी झाली. शेकडो मीटरपर्यंत पसरलेल्या रांगांमधून ‘हर हर महादेव’च्या जयघोषांनी परिसर दुमदुमला.
मंदिर फुलांनी सजविण्यात आले असून आकर्षक सजावट पाहण्यासाठीही भाविक उत्सुक होते. देवस्थान समिती व ग्रामस्थांच्या वतीने महाप्रसाद, खिचडी वितरणासह आरोग्य शिबिराचे आयोजन करण्यात आले. गावातील शाळकरी मुलांनीही सहलीच्या निमित्ताने सोमेश्वर देवाचे दर्शन घेतले.
भाविकांच्या सोयीसाठी पाणी, सावली व सुरक्षा यांची विशेष काळजी घेण्यात आली होती. दिवसभर अभिषेक, भजनी मंडळांची उपस्थिती, सायंकाळी कीर्तन अशा धार्मिक कार्यक्रमांनी मंदिर परिसर भक्तिमय झाला. तालुक्यातील विविध भागांतून शिवभक्तांनी मोठ्या संख्येने हजेरी लावली.
