रांजणगाव MIDC पोलिस स्टेशन मध्ये दोन जणांवर गुन्हा दाखल
शिरुर (तेजस फडके): कारेगाव (ता. शिरुर) येथील यश इन चौकात राहणाऱ्या हॉटेल व्यावसायिकाला चाकूचा धाक दाखवत, मारहाण करत जीवे मारण्याची धमकी देत त्याच्या बँक खात्यातील पैसे जबरदस्तीने स्वतःच्या बँक खात्यात जबरदस्तीने घेतल्याने दोन जणांवर गुन्हा दाखल झाला असुन योगेश सुनिल बारवकर (वय 27 वर्ष) रा.शिरुर बायपास पाषाणमळा (ता. शिरुर) जि.पुणे आणि गौतम छगन शिंदे (वय 30 वर्ष) रा.पिंपरी कोलंदर ता.श्रीगोदा जि.अहमदनगर सध्या रा.यशईन चौक कारेगाव (ता. शिरुर) जि.पुणे अशी त्यांची नावे आहेत. याबाबत रवींद्र बाबन जेना (वय 44 वर्ष) रा.कारेगाव, यश-इन चौक मूळ रा. बारभाटिया, ता. कोमलदा जि. बालेश्वर, राज्य ओडिसा यांनी रांजणगाव MIDC पोलिस स्टेशन येथे फिर्याद दाखल केली आहे.
याबाबत रांजणगाव MIDC पोलिसांनी दिलेल्या माहितीनुसार, यश इन चौक येथे योगेश बारवकर व गौतम शिंदे यांचे चायनीजचे हॉटेल असुन फिर्यादी रवींद्र बाबन जेना यांनी हॉटेल व्यवसायाकरिता काढलेल्या कर्जाचे 1 लाख रुपये रुपये त्यांच्या बँक खात्यात जमा झालेले असताना त्यापैकी 89 हजार रुपये फिर्यादीचा मोबाईल काढुन घेत त्याला चाकूचा धाक दाखवत हाताने मारहाण करुन जीवे मारण्याची धमकी देत आरोपी योगेश सुनील बारवकर याने जबरदस्तीने ट्रान्सफर करून घेतले. सदरबाबत त्यांनी पोलीस स्टेशनला अथवा कुणाकडे तक्रार केली तर “उलटा टांग के काट के फेक दूंगा” असे म्हणून ओप्पो कंपनीचा मोबाईल घेऊन गेला.
त्यामुळे फिर्यादीने रांजणगाव MIDC पोलिस स्टेशनला धाव घेत वरील दोघांच्या विरोधात फिर्याद दिल्याने गुन्हा दाखल करण्यात आला असुन पोलिसांनी दोन्ही आरोपिंना अटक करुन शिरुर न्यायालयात हजर केले असता त्यांना दोन दिवसांची पोलिस कोठडी मिळाली आहे. पोलिस निरीक्षक बलवंत मांडगे यांच्या मार्गदर्शनाखाली या घटनेचा पुढील तपास पोलिस उपनिरीक्षक सुहास रोकडे करत आहेत.
