शिक्रापूर (शेरखान शेख): शिक्रापूर (ता. शिरुर) येथील चाकण चौक परिसरात दोघे मित्र उभे असताना अज्ञात युवकाने त्यांना शिवीगाळ, दमदाटी करत त्याच्या जवळील पिस्तुल मधून गोळीबार केल्याची घटना घडल्याने खळबळ उडाली असून शिक्रापूर पोलीस स्टेशन येथे अज्ञात युवकावर गुन्हा दाखल करण्यात आला आहे.
शिक्रापूर (ता. शिरुर) येथील चाकण चौक परिसरात रोहन पाठक व अजय चव्हाण हे दोघे उभे रात्रीच्या सुमारास अंधारात उभे असताना एक युवक दुचाकीहून सदर ठिकाणी आला त्याने दोघांच्या डोळ्यावर दुचाकीची लाईट मारून शिवीगाळ, दमदाटी करत अचानक कमरेला लावलेले पिस्तुल काढून रोहनच्या दिशेने पिस्तुल रोखून गोळीबार करत पुन्हा पिस्तुल रोहनच्या डोक्याला लावून निघून जा नाहीतर गोळीच घालीन, अशी धमकी दिली.
सदर घटनेची माहिती मिळताच पोलीस निरीक्षक प्रमोद क्षिरसागर, सहाय्यक पोलीस निरीक्षक वैभव पवार, रणजीत पठारे, पोलीस हवालदार श्रीमंत होनमाने, शिवाजी चितारे, आत्माराम तळोले, मिलिंद देवरे, पोलीस शिपाई किशोर शिवणकर, जयदीप देवकर, अंकुश चौधरी यांनी सदर ठिकाणी धाव घेत पाहणी केली असता त्यांना येथे पिस्तुलची पुंगळी मिळून आली. तर घडलेल्या घटनेबाबत रोहन राकेश पाठक (वय २३) रा. पाटवस्ती शिक्रापूर (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात युवकावर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस उपनिरीक्षक अमोल खटावकर हे करत आहे.
