राहुरी (अहिल्यानगर): अहिल्यानगर जिल्ह्यातील राहुरी शहरात कर्तव्यावर असलेल्या एका पोलीस कर्मचाऱ्यावर ७ ते ८ जणांच्या टोळक्याने बेदम मारहाण केल्याची धक्कादायक घटना समोर आली आहे. या घटनेचा व्हिडिओ सोशल मीडियावर मोठ्या प्रमाणात व्हायरल झाला असून परिसरात खळबळ उडाली आहे.
मिळालेल्या माहितीनुसार, विकास वैराळ असे मारहाण झालेल्या पोलीस कर्मचाऱ्याचे नाव आहे. व्हायरल झालेल्या व्हिडिओमध्ये काही जणांनी एका इमारतीसमोर वैराळ यांना घेरून कपडे फाटेपर्यंत मारहाण केल्याचे दिसत आहे. या घटनेमुळे राहुरीसह संपूर्ण अहिल्यानगर जिल्ह्यात संतापाची लाट उसळली असून या हल्ल्याचे नेमके कारण काय, याची चर्चा सर्वत्र सुरू आहे.
या प्रकरणी राहुरी पोलीस ठाण्यात ४ जणांसह ११ अनोळखी व्यक्तींविरोधात गुन्हा दाखल करण्यात आला आहे. पोलिसांनी आतापर्यंत तिघांना अटक केली असून इतर संशयितांचा शोध सुरू आहे.
मारहाणीत विकास वैराळ हे गंभीर जखमी झाले असून त्यांच्यावर सध्या जिल्हा रुग्णालयात उपचार सुरू आहेत. दरम्यान, हल्ल्याचे नेमके कारण काय होते, तसेच घटनास्थळी उपस्थित असलेल्या दुसऱ्या पोलीस कर्मचाऱ्याने हस्तक्षेप का केला नाही, याबाबत पोलिसांकडून तपास सुरू असल्याची माहिती मिळाली आहे.
